కర్ణాటక కాంగ్రెస్‌లో స్టింగ్‌ ఆపరేషన్‌ వ్యవహారం కలకలం రేపుతోంది. ఆ పార్టీ నేత, మాజీ ప్రధాన కార్యదర్శి కృపా అల్వాపై కాంగ్రెస్‌ అధిష్ఠానం కఠిన చర్యలు తీసుకుంది. పార్టీ వ్యతిరేక కార్యకలాపాలకు పాల్పడ్డారన్న ఆరోపణలతో ఆమెను ఆరేళ్ల పాటు పార్టీ నుంచి బహిష్కరించింది. ఈ మేరకు కర్ణాటక ప్రదేశ్‌ కాంగ్రెస్‌ కమిటీ (కేపీసీసీ) ఉత్తర్వులు జారీ చేసింది. 

స్టింగ్‌ ఆపరేషన్‌ వ్యవహారంలో కృపా అల్వా పేరు తెరపైకి వచ్చింది. ఈ అంశంపై వివరణ ఇవ్వాలంటూ పార్టీ నాయకత్వం ఆమెకు షోకాజ్‌ నోటీసు జారీ చేసింది. అయితే ఆమె నుంచి ఎలాంటి సమాధానం రాలేదని కేపీసీసీ ఉపాధ్యక్షుడు ఎం. నారాయణస్వామి వెల్లడించారు. ఈ వ్యవహారంతో పార్టీకి చెడ్డపేరు వచ్చిందని, మీడియా కథనాలతో ఇబ్బందికర పరిస్థితులు ఎదురయ్యాయని బహిష్కరణ ఉత్తర్వుల్లో పేర్కొన్నారు. 

కర్ణాటక మాజీ ముఖ్యమంత్రి సిద్ధరామయ్యను లక్ష్యంగా చేసుకుని ఓ వీడియో ప్రచారంలోకి వచ్చింది. అందులోని ఆరోపణలు నిరాధారమని సిద్ధరామయ్య ఖండించారు. ఈ వీడియో వెనుక కృపా అల్వా, కన్నడ మీడియా సంస్థకు చెందిన రాకేశ్‌ శెట్టి ఉన్నారని ఆయన ఆరోపించారు. వీడియో ప్రసారం, ప్రచురణపై మీడియా సంస్థలకు వ్యతిరేకంగా కోర్టు నుంచి ఉత్తర్వులు కూడా పొందారు. 

ఈ వీడియోలో చేసిన ఆరోపణలపై బెంగళూరు పోలీసులు దర్యాప్తు చేపట్టారు. అందులో పేర్కొన్న లైంగిక వేధింపుల ఘటనకు సంబంధించి సేకరించిన వాంగ్మూలాలు, ఆధారాలు ఎలాంటి నిర్ధారణ ఇవ్వడం లేదని పోలీసులు తెలిపారు. ఆ కథనం కల్పితంగా రూపొందించినదని ప్రాథమికంగా పేర్కొన్నారు. ఈ వ్యవహారంపై దర్యాప్తు కొనసాగుతోంది.