- అశ్లీల, అభ్యంతరకర కంటెంట్‌ను అరికట్టేందుకు కఠిన నిర్ణయం తీసుకున్న కేంద్రం
- 50 ఓటీటీల యాక్సెస్‌ను పూర్తిగా నిలిపివేసిన వైనం
- గూగుల్ ప్లే స్టోర్, యాపిల్ యాప్ స్టోర్ ల నుంచి తక్షణమే తొలగించాలని ఆదేశం
డిజిటల్ ప్లాట్‌ఫారమ్‌లలో అశ్లీల, అభ్యంతరకర కంటెంట్‌ను అరికట్టేందుకు కేంద్ర ప్రభుత్వం మరో కఠిన నిర్ణయం తీసుకుంది. సమాజానికి హానికరం కలిగించేలా అసభ్యకర దృశ్యాలను ప్రసారం చేస్తున్న 50 ఓటీటీ యాప్‌లను దేశవ్యాప్తంగా బ్లాక్ చేస్తూ సంచలన ఆదేశాలు జారీ చేసింది. గతేడాది 25, ఈ ఏడాది ఫిబ్రవరిలో మరో 5 యాప్‌లపై చర్యలు తీసుకున్న కేంద్రం, తాజాగా మరిన్ని యాప్‌లపై ఉక్కుపాదం మోపడం గమనార్హం.
కఠిన చట్టాల కింద చర్యలు:
సమాచార సాంకేతిక (డిజిటల్ మీడియా ఎథిక్స్ కోడ్) నిబంధనలు-2021 ప్రకారం ఈ యాప్‌లపై చర్యలు తీసుకున్నారు. ఈ ప్లాట్‌ఫారమ్‌లలోని కంటెంట్ భారతీయ శిక్షాస్మృతి (IPC) సెక్షన్ 294తో పాటు మహిళల అసభ్య ప్రాతినిధ్య (నిషేధ) చట్టంలోని సెక్షన్ 4కు విరుద్ధంగా ఉన్నట్లు అధికారులు గుర్తించారు. వ్యూస్, సబ్‌స్క్రిప్షన్ల ఆదాయం కోసమే ఇలాంటి అశ్లీల దృశ్యాలను ప్రోత్సహిస్తున్నట్లు తేలడంతో వీటి యాక్సెస్‌ను పూర్తిగా నిలిపివేశారు.
