టెక్ దిగ్గజం మైక్రోసాఫ్ట్ తన గేమింగ్ విభాగమైన 'ఎక్స్‌బాక్స్‌'లో భారీ పునర్‌వ్యవస్థీకరణకు శ్రీకారం చుట్టింది. ఈ ప్రక్రియలో భాగంగా ప్రపంచవ్యాప్తంగా సుమారు 4,800 మంది ఉద్యోగులను తొలగిస్తుండగా, ఇందులో మెజారిటీ ఉద్యోగులు ఎక్స్‌బాక్స్ విభాగానికి చెందిన వారే కావడం గమనార్హం. దాదాపు 37 ఏళ్లుగా సంస్థలో సేవలందిస్తున్న వైస్ ప్రెసిడెంట్ కెవిన్ లాచాపెల్‌ను సైతం ఈ లేఆఫ్స్ జాబితాలో చేర్చడం ఇప్పుడు కార్పొరేట్ వర్గాల్లో చర్చనీయాంశంగా మారింది.

మైక్రోసాఫ్ట్ ప్రకటించిన ఈ కోతల్లో భాగంగా ఎక్స్‌బాక్స్ విభాగం నుండి సుమారు 3,200 మందిని, అంటే దాదాపు 20 శాతం ఉద్యోగులను తొలగిస్తున్నారు. జూలై 6న వెలువడిన ప్రకటన ప్రకారం, తక్షణమే 1,600 మందిని విధుల్లో నుంచి తొలగించగా, 2027 ఆర్థిక సంవత్సరం ముగింపు నాటికి మరో 1,600 మందిని తొలగించనున్నారు. ఎక్స్‌బాక్స్ చరిత్రలోనే ఇది అతిపెద్ద పునర్‌వ్యవస్థీకరణ అని సంస్థ సీఈఓ ఆశా శర్మ ఉద్యోగులకు పంపిన మెమోలో పేర్కొన్నారు.

తనను కూడా ఉద్యోగం నుంచి తొలగిస్తున్నట్లు కెవిన్ లాచాపెల్ స్వయంగా తన లింక్డ్‌ఇన్ పోస్ట్‌లో వెల్లడించారు. 1989లో సాఫ్ట్‌వేర్ ఇంజనీర్‌గా మైక్రోసాఫ్ట్‌‌లో చేరిన ఆయన, సంస్థతో తనకున్న సుదీర్ఘ ప్రయాణం ముగిసిందని పేర్కొన్నారు. ఎక్స్‌బాక్స్‌లో అత్యంత కీలకమైన "బ్యాక్‌వర్డ్ కంపాటిబిలిటీ" ప్రోగ్రామ్‌కు ఆయన నాయకత్వం వహించిన విషయాన్ని ఈ సందర్భంగా గుర్తుచేసుకున్నారు.

ఆర్టిఫిషియల్ ఇంటెలిజెన్స్ (ఏఐ) ప్రభావంతో పని విధానంలో వస్తున్న మార్పులు, ఆశించిన స్థాయిలో సంస్థ పనితీరు లేకపోవడం వంటి కారణాలతో ఈ నిర్ణయం తీసుకున్నట్లు మైక్రోసాఫ్ట్ తెలిపింది. ప్రస్తుతం తమ వ్యాపారం ఆశించిన లక్ష్యాలను చేరుకోవడం లేదని, అందుకే అనివార్య పరిస్థితుల్లో ఈ కఠిన నిర్ణయం తీసుకోవాల్సి వచ్చిందని ఎక్స్‌బాక్స్ సీఈఓ ఆశా శర్మ ఉద్యోగులకు రాసిన లేఖలో స్పష్టం చేశారు.