సిక్కు మత మనోభావాలను కించపరిచే విధంగా ఉన్న వివాదాస్పద వైరల్ వీడియోపై పంజాబ్ ముఖ్యమంత్రి భగవంత్ మాన్ స్పందించారు. ఆ వీడియోలో ఉన్నది తాను కాదని, తన రూపంతో తయారు చేసిన మాస్క్ ధరించిన మరో వ్యక్తి అని ఆయన గురువారం స్పష్టం చేశారు. ఈ వీడియో వెనుక లోతైన రాజకీయ కుట్ర దాగి ఉందని ఆయన ఆరోపించారు.

మొహాలీలో నిర్వహించిన విలేకరుల సమావేశంలో భగవంత్ మాన్ మాట్లాడుతూ, ఈ వీడియోను కెనడాకు చెందిన పంజాబీ ఎన్నారై జగ్మన్ సమ్రా సృష్టించారని ఆరోపించారు. వీడియోలోని వ్యక్తికి, తనకు మధ్య ఉన్న వ్యత్యాసాలను ఆయన ఈ సందర్భంగా వివరించారు. "నాకు చిన్నప్పుడు జరిగిన ఆపరేషన్ కారణంగా మెడపై ఒక గాటు గుర్తు ఉంది. కానీ వీడియోలోని వ్యక్తికి ఆ గుర్తు లేదు. అంతేకాకుండా, మా ఇద్దరి ఎత్తులో రెండు అంగుళాల తేడా ఉండటంతో పాటు నడక శైలి కూడా భిన్నంగా ఉంది. వీడియోను నిశితంగా గమనిస్తే మెడ వద్ద మాస్క్ అంచులు స్పష్టంగా కనిపిస్తున్నాయి" అని పేర్కొన్నారు. నిందితుడు సమ్రాను ఇంటర్‌పోల్ సహకారంతో స్వదేశానికి రప్పించేందుకు తగిన చర్యలు తీసుకుంటామని ఆయన వెల్లడించారు.

గత కొన్ని రోజులుగా సోషల్ మీడియాలో చక్కర్లు కొడుతున్న ఈ వీడియోలో, భగవంత్ మాన్‌ను పోలిన వ్యక్తి సిక్కు గురువుల చిత్రపటాల వద్ద మద్యం సేవిస్తూ అపవిత్రంగా ప్రవర్తించినట్లుగా ఉంది. ఈ ఘటనపై సిక్కుల అత్యున్నత ధార్మిక సంస్థ అకాల్ తఖ్త్ తీవ్రంగా స్పందిస్తూ.. భగవంత్ మాన్‌ను 'గురు వ్యతిరేకి'గా ప్రకటించింది.

అయితే, తనను రాజకీయంగా ఎదుర్కోలేక కాంగ్రెస్, శిరోమణి అకాలీదళ్, బీజేపీలు కలిసి ఈ కుట్రకు తెరలేపాయని భగవంత్ మాన్ ఆరోపించారు. మరోవైపు, ముఖ్యమంత్రి వాదనలను ప్రతిపక్షాలు తీవ్రంగా ఖండించాయి. ఇది 'అబద్ధాల ముసుగు' అని బీజేపీ విమర్శించగా, ఈ వ్యవహారంపై నిష్పక్షపాతంగా ఫోరెన్సిక్ విచారణ జరిపించాలని కాంగ్రెస్ డిమాండ్ చేసింది. పంజాబ్ అసెంబ్లీ ఎన్నికలకు ఏడాది కంటే తక్కువ సమయం ఉన్న నేపథ్యంలో, ఈ వివాదం రాష్ట్ర రాజకీయాల్లో తీవ్ర ప్రకంపనలు సృష్టిస్తోంది.