బీర్ కావాలా? అంటూ ఆసీస్ ఫ్యాన్ స్లెడ్జింగ్.. ఇంగ్లండ్ ప్లేయ‌ర్‌ బెన్ డకెట్ అదిరిపోయే రిప్లై!

యాషెస్ సిరీస్‌లో భాగంగా ఆస్ట్రేలియా, ఇంగ్లండ్ మధ్య జరిగిన నాలుగో టెస్టులో ఓ ఆసక్తికర ఘటన చోటుచేసుకుంది. మ్యాచ్ రెండో రోజు ఆటలో బౌండరీ వద్ద ఫీల్డింగ్ చేస్తున్న ఇంగ్లండ్ ఓపెనర్ బెన్ డకెట్‌ను ఉద్దేశించి ఓ ఆస్ట్రేలియా అభిమాని "బీర్ కావాలా?" అని గట్టిగా అరుస్తూ స్లెడ్జింగ్ చేశాడు. ఇటీవల డకెట్ మద్యం మత్తులో హోటల్ రూమ్‌కు వెళ్లలేక ఇబ్బంది పడిన వీడియో ఒకటి వైరల్ అయిన నేపథ్యంలో అభిమాని ఈ విధంగా అతడిని రెచ్చగొట్టే ప్రయత్నం చేశాడు. అయితే, ఈ స్లెడ్జింగ్‌ను డకెట్ చాలా స్పోర్టివ్‌గా తీసుకుని, తనదైన శైలిలో అదిరిపోయే సమాధానం ఇచ్చాడు. కావాలి.. తీసుకురా అన్న‌ట్టుగా సైగ‌లు చేశాడు. ఇది అక్కడి ప్రేక్షకులను ఎంతగానో ఆకట్టుకుంది.

ఈ మ్యాచ్‌లో ఇంగ్లండ్ 4 వికెట్ల తేడాతో అద్భుత విజయం సాధించింది. ఆస్ట్రేలియా గడ్డపై వరుసగా 18 టెస్టుల్లో గెలవలేకపోయిన ఇంగ్లండ్, ఈ విజయంతో ఆ ఓటముల పరంపరకు తెరదించింది. అంతేకాకుండా ఈ సిరీస్‌లో క్లీన్‌స్వీప్ ముప్పు నుంచి కూడా తప్పించుకుంది. కేవలం రెండు రోజుల్లోనే ముగిసిన ఈ మ్యాచ్‌లో ఇంగ్లండ్ 175 పరుగుల లక్ష్యాన్ని కేవలం 33 ఓవర్లలోనే ఛేదించింది. కఠినమైన బ్యాటింగ్ పరిస్థితుల్లోనూ ఇంగ్లండ్ బ్యాటర్లు తమ 'బజ్‌బాల్' దూకుడు శైలితో రాణించారు.

ఈ ఛేదనలో బెన్ డకెట్ 34 పరుగులతో కీలక ఇన్నింగ్స్ ఆడి జట్టు విజయానికి బాటలు వేశాడు. అభిమాని స్లెడ్జింగ్‌కు మాటలతోనే కాక, తన ఆటతోనూ గట్టి సమాధానం ఇచ్చాడు. ప్రస్తుతం ఐదు మ్యాచ్‌ల ఈ సిరీస్‌లో ఆస్ట్రేలియా 3-1 ఆధిక్యంలో ఉంది. ఇరు జట్ల మధ్య చివరిదైన ఐదో టెస్టు జనవరి 4 నుంచి 8 వరకు సిడ్నీలో జరగనుంది.