ఆకాశాన్ని శాసించే అమెరికా అగ్రశ్రేణి యుద్ధ విమానం... శత్రువుల రాడార్లకు చిక్కని అత్యాధునిక ఐదో తరం స్టీల్త్ ఫైటర్ జెట్... గంటకు వేల మైళ్ల వేగంతో దూసుకెళ్లే ఎఫ్-22 రాప్టర్‌ను నడపాలంటే ఇప్పుడు సాంకేతిక ప్రపంచం ఎప్పుడో మరిచిపోయిన ఒక పాత వస్తువు కావాలి. ఆధునిక స్మార్ట్‌ఫోన్‌లో నాలుగైదు ఫోటోలు పట్టేంతటి మెమరీ కూడా లేని 256 ఎంబీ మెమరీ కార్డుల కోసం ఇప్పుడు అగ్రరాజ్యం వెతుకులాట ప్రారంభించింది.

మిషన్ డేటా కోసం నాటి సాంకేతికతే ఆధారం
ఎఫ్-22 రాప్టర్ యుద్ధ విమానంలో మిషన్ సమాచారాన్ని ఫీడ్ చేయడానికి నేటికీ తొంభైల కాలం నాటి రిమూవబుల్ ఫ్లాష్ మెమరీ కార్డులనే వినియోగిస్తున్నారు. ఫైటర్ జెట్‌లోని డేటా ట్రాన్స్‌ఫర్ కార్ట్రిడ్జ్ (డీటీసీ) వ్యవస్థలో ఈ కార్డులు కీలకం. టేకాఫ్‌కు ముందు ఫ్లైట్ రూట్లు, రేడియో ఫ్రీక్వెన్సీ సెట్టింగ్స్, శత్రు ముప్పునకు సంబంధించిన డేటాను గ్రౌండ్ సిస్టమ్స్ నుంచి విమానంలోకి ఎక్కించేందుకు, అలాగే మిషన్ పూర్తయ్యాక ఫ్లైట్ వివరాలను రీడ్ చేయడానికి పైలట్లు వీటిపైనే ఆధారపడుతున్నారు.

కొత్తవి వద్దు.. పాతవే ముద్దు
ప్రస్తుతం విపణిలో వందల గిగాబైట్లు, టెరాబైట్ల సామర్థ్యం ఉన్న స్టోరేజ్ డివైజ్‌లు అందుబాటులో ఉన్నప్పటికీ, రాప్టర్‌కు మాత్రం పాత కార్డులే కావాలి. కనీసం 256 ఎంబీ సామర్థ్యం ఉన్న పీసీ స్టాండర్డ్ 95 టైప్-II ఫ్లాష్ కార్డులు లేదా ప్యాసివ్ అడాప్టర్లతో కూడిన కాంపాక్ట్ ఫ్లాష్ (సీఎఫ్) కార్డులను సరఫరా చేయగల అమెరికన్ కంపెనీల కోసం అమెరికా ఎయిర్ ఫోర్స్ తాజాగా నోటీసు జారీ చేసింది. ఆధునిక చిప్‌లు విమానంలోని పాత హార్డ్‌వేర్, సాఫ్ట్‌వేర్ ఆర్కిటెక్చర్‌కు సరిపోకపోవడమే దీనికి ప్రధాన కారణం.

ఎఫ్ఏటీ16 ఫార్మాట్‌తోనే పొంతన
ఈ మెమరీ కార్డులు ప్రభుత్వ హోస్ట్ సిస్టమ్‌తో సమన్వయం కావడంతో పాటు, 1980ల నాటి ఫైల్ అలోకేషన్ టేబుల్ (ఎఫ్ఏటీ16) ఫార్మాట్‌లో ప్రీ-ఫార్మాట్ అయి ఉండాలని ఎయిర్ ఫోర్స్ నిర్దేశించింది. ఏవియానిక్స్ వ్యవస్థలతో సంపూర్ణ అనుకూలత సాధించడానికే ఈ నిబంధన విధించారు. తాజా అవసరాల కోసం ఎయిర్ ఫోర్స్ మార్కెట్ పరిశోధన ప్రారంభించింది. అర్హత గల సంస్థలు 2026 డిసెంబరు 1లోగా వివరాలు సమర్పించాలని కోరింది. 2030 వరకు ఈ రాప్టర్లను సేవల్లో కొనసాగించాలనే యోచనలో ఉన్న పెంటగాన్‌కు, ఈ పాతకాలపు విడిభాగాలను సంపాదించడం ఇప్పుడు ఒక సరికొత్త సవాలుగా మారింది.