కడప జిల్లా పులివెందుల నియోజకవర్గంలో ఎన్నికల ప్రచారం సందర్భంగా తీవ్ర ఉద్రిక్త పరిస్థితులు నెలకొన్నాయి. వైసీపీ, టీడీపీ నేతల కాన్వాయ్‌లు ఎదురుపడటంతో ఇరువర్గాల మధ్య ఘర్షణ వాతావరణం ఏర్పడింది. ఈ క్రమంలో శాంతిభద్రతలకు విఘాతం కలగకుండా ఉండేందుకు కడప ఎంపీ వైఎస్ అవినాశ్ రెడ్డిని పోలీసులు అదుపులోకి తీసుకుని, అనంతరం స్టేషన్ బెయిల్‌పై విడుదల చేశారు.

ఎన్నికల ప్రచారంలో భాగంగా సింహాద్రిపురం మండలం అంకాలమ్మ గూడూరు సమీపంలో అవినాశ్ రెడ్డి కాన్వాయ్, టీడీపీ పులివెందుల ఇన్‌ఛార్జ్, ఎమ్మెల్సీ బీటెక్ రవి కాన్వాయ్ ఒకేసారి ఎదురెదురుగా వచ్చాయి. ఈ సమయంలో ఇరు పార్టీల కార్యకర్తలు, మద్దతుదారులు భారీగా పోటాపోటీ నినాదాలు చేసుకోవడంతో ఒక్కసారిగా ఉద్రిక్తత చెలరేగింది. అనంతరం ఇరు వర్గాలు తమ మద్దతుదారులను సమీకరించేందుకు ప్రయత్నించడంతో ఘర్షణలు జరిగే అవకాశముందని పోలీసులు గుర్తించారు.

పరిస్థితి చేయిదాటిపోకుండా కడప జిల్లా ఎస్పీ ఆదేశాలతో పోలీసులు రంగంలోకి దిగారు. పులివెందులలో అవినాశ్ రెడ్డిని అదుపులోకి తీసుకున్నారు. ఈ వ్యవహారంపై పోలీసు అధికారులు స్పందిస్తూ... "పులివెందులలో శాంతిభద్రతల పరిరక్షణలో భాగంగానే అవినాశ్ రెడ్డిని అదుపులోకి తీసుకున్నాం. ఇరువర్గాలు రెచ్చగొట్టేలా వ్యవహరించడంతో ముందస్తు చర్యలు చేపట్టాం" అని స్పష్టం చేశారు.

అనంతరం పోలీస్ స్టేషన్ వద్ద ప్రక్రియ పూర్తి చేసి అవినాశ్ రెడ్డికి స్టేషన్ బెయిల్ మంజూరు చేశారు. ఈ ఉద్రిక్తతలకు సంబంధించి ఎంపీ అవినాశ్ రెడ్డి, ఎమ్మెల్సీ బీటెక్ రవి ఇద్దరిపైనా పోలీసులు కేసులు నమోదు చేసి దర్యాప్తు చేస్తున్నారు. నియోజకవర్గంలో అవాంఛనీయ ఘటనలు జరగకుండా భారీగా బలగాలను మోహరించారు.