హైదరాబాద్ మరోసారి అంతర్జాతీయ స్థాయిలో తన సత్తా చాటింది. దేశంలోనే అత్యంత వేగంగా అభివృద్ధి చెందుతున్న నగరాల్లో ఒకటిగా ఉన్న భాగ్యనగరం, ఇప్పుడు ఆసియా-పసిఫిక్ ప్రాంతంలోని అత్యంత ఖరీదైన రిటైల్ వీధుల్లో ఒకటిగా గుర్తింపు పొందింది. ప్రముఖ రియల్ ఎస్టేట్ కన్సల్టెన్సీ సంస్థ 'కుష్‌మన్‌ అండ్‌ వేక్‌ఫీల్డ్‌' విడుదల చేసిన 'మెయిన్‌ స్ట్రీట్స్‌ అక్రాస్‌ ది వరల్డ్‌ - 2026' నివేదికలో హైదరాబాద్‌లోని మూడు కీలక ప్రాంతాలు చోటు దక్కించుకున్నాయి.

అంతర్జాతీయ జాబితాలో మన వీధులు
ఈ నివేదిక ప్రకారం, ఆసియా-పసిఫిక్ ప్రాంతంలోని ఖరీదైన రిటైల్ వీధుల జాబితాలో జూబ్లీహిల్స్‌ 51వ స్థానంలో నిలిచింది. బంజారాహిల్స్‌, హిమాయత్‌నగర్‌లు సంయుక్తంగా 52వ స్థానాన్ని కైవసం చేసుకున్నాయి. షాపింగ్, వాణిజ్య కార్యకలాపాలకు కేరాఫ్‌గా నిలిచే ఈ ప్రాంతాల్లో దుకాణాల అద్దెలు ఆకాశాన్నంటుతున్నాయి. నివేదిక ప్రకారం, జూబ్లీహిల్స్‌లో చదరపు అడుగుకు నెలకు సగటున రూ. 250, బంజారాహిల్స్‌లో రూ. 230, హిమాయత్‌నగర్‌లో రూ. 225 అద్దె పలుకుతోంది. అంటే, ఈ ప్రాంతాల్లో వెయ్యి చదరపు అడుగుల దుకాణం పెట్టాలంటే నెలకు రూ. 2.25 లక్షల నుంచి రూ. 2.50 లక్షల వరకు అద్దెగా చెల్లించాల్సిందే.

అయితే, దేశంలోని ఇతర మెట్రో నగరాలతో పోలిస్తే ఈ అద్దెలు తక్కువే కావడం గమనార్హం. దేశంలోనే అత్యంత ఖరీదైన రిటైల్ ప్రాంతంగా ఢిల్లీలోని ఖాన్ మార్కెట్ నిలిచింది. అక్కడ చదరపు అడుగుకు నెలకు ఏకంగా రూ. 1,875 అద్దె ఉండగా, ఇది గ్లోబల్ జాబితాలో 25వ స్థానంలో ఉంది. ముంబైలోని లింకింగ్ రోడ్ రూ. 1,175 అద్దెతో 33వ స్థానంలో నిలిచింది.

ఒక్కో ప్రాంతానిది ఒక్కో ప్రత్యేకత
హైదరాబాద్‌లోని ఈ మూడు ప్రాంతాలు వేటికవే ప్రత్యేకం. జూబ్లీహిల్స్‌, బంజారాహిల్స్‌లో ప్రీమియం బొటిక్‌లు, డిజైనర్ స్టోర్లు, ఖరీదైన బ్రాండ్ల షోరూమ్‌లు, కేఫ్‌లు ఎక్కువగా కనిపిస్తాయి. ముఖ్యంగా జూబ్లీహిల్స్‌లోని రోడ్ నంబర్ 36 'హై స్ట్రీట్'గా ప్రత్యేక గుర్తింపు పొందింది. మరోవైపు, హిమాయత్‌నగర్‌ సంప్రదాయ షాపింగ్‌కు చిరునామాగా నిలుస్తోంది. ఆభరణాలు, వస్త్రాలు, ఫుడ్ ఔట్‌లెట్లతో నిత్యం జనసందడితో కళకళలాడుతూ ఉంటుంది.

హై స్ట్రీట్‌పై బ్రాండ్ల మోజు
ఈ ప్రాంతాల్లో భారీ వ్యాపార కార్యకలాపాలు జరగడమే బ్రాండ్లు ఇక్కడకు క్యూ కట్టడానికి కారణమని నిపుణులు చెబుతున్నారు. కుష్‌మన్‌ అండ్‌ వేక్‌ఫీల్డ్ నివేదిక ప్రకారం, 2026 మూడో త్రైమాసికంలో హైదరాబాద్‌లో ఏకంగా 4.5 లక్షల చదరపు అడుగుల రిటైల్ లీజింగ్ జరిగింది. ఇందులో 86 శాతం ప్రధాన రహదారుల వెంబడి ఉన్న హైస్ట్రీట్ ప్రాంతాల్లోనే కావడం విశేషం. ముఖ్యంగా ఫ్యాషన్ బ్రాండ్లు ఈ ప్రాంతాల్లో స్టోర్లను ఏర్పాటు చేయడానికి అధిక ప్రాధాన్యం ఇస్తున్నాయి. ఈ పరిణామం భాగ్యనగరం రిటైల్ రంగంలో ఎంత బలంగా ఎదుగుతోందో చెప్పడానికి నిదర్శనంగా నిలుస్తోంది.