హైదరాబాద్ నగరంలోని హోటళ్లు, రెస్టారెంట్లలో ప్రజల ఆరోగ్యాన్ని ఫణంగా పెడుతున్న నిర్వాహకులపై టీజీ సేఫ్ (టాస్క్‌ఫోర్స్) అధికారులు కొరడా ఝుళిపించారు. అపరిశుభ్ర వాతావరణంలో ఆహారాన్ని అందిస్తున్న పలు ప్రముఖ రెస్టారెంట్ల ఫుడ్ సేఫ్టీ లైసెన్సులను బుధవారం రద్దు చేశారు. వీటిలో సికింద్రాబాద్‌లోని అల్ఫా హోటల్ కూడా ఉండటం గమనార్హం. నగరవ్యాప్తంగా చేపట్టిన ఈ తనిఖీలు హోటళ్ల నిర్వాహకుల్లో కలకలం రేపాయి.

సికింద్రాబాద్ రైల్వే స్టేషన్ సమీపంలోని అల్ఫా హోటల్‌లో తనిఖీలు నిర్వహించిన అధికారులు అక్కడి పరిస్థితులు చూసి నిర్ఘాంతపోయారు. పెచ్చులూడిపోతున్న గోడలు, నిండిపోయిన డ్రైనేజీలు, వంటగది పరిసరాల్లో పావురాల విసర్జితాలు, వండిన ఆహారాన్ని నిల్వ ఉంచడం, దుర్వాసన వెదజల్లుతున్న మరుగుదొడ్లను గుర్తించారు. దీంతో వెంటనే హోటల్ లైసెన్సును రద్దు చేస్తూ ఉత్తర్వులు జారీ చేశారు.

ఇదే తరహాలో, వెంగళ్‌రావు నగర్‌లోని పందెంకోడి రెస్టారెంట్‌లో తుప్పుపట్టిన కత్తులు, వంటగది నిండా బొద్దింకలు కనిపించాయి. జూబ్లీహిల్స్‌లోని లాహమ్‌ హౌస్‌లో చెత్తను తొలగించకుండా వంటలు చేయడం, గౌలిదొడ్డిలోని స్పైస్‌ కిచెన్‌లో వండిన, పచ్చి మాంసాన్ని కలిపి నిల్వ ఉంచడాన్ని అధికారులు గుర్తించారు. వీటితో పాటు కూకట్‌పల్లిలోని న్యూ బ్లూస్టార్ రెస్టారెంట్, పంజాగుట్టలోని శ్రీనివాస బాయ్స్ హాస్టల్ ఫుడ్ లైసెన్సులను కూడా రద్దు చేశారు. ఈ తనిఖీల సందర్భంగా సుమారు 300 కిలోల నాసిరకం ఆహార పదార్థాలను అధికారులు అక్కడికక్కడే పారబోయించారు.

మరోవైపు, సికింద్రాబాద్ ఎస్‌పీ రోడ్డులోని తత్వ రెస్టారెంట్‌కు వారం రోజుల్లో మార్పులు చేసుకోవాలని ఇంప్రూవ్‌మెంట్ నోటీసులు జారీ చేశారు. బంజారాహిల్స్‌లోని లాజ్వత్ హైదరాబాద్‌వాలా, నిజాంపేటలోని కేపీఎన్ ఫ్రెష్, శేరిలింగంపల్లిలోని ప్రిన్స్ అరేబియన్ రెస్టారెంట్లకు షోకాజ్ నోటీసులు ఇచ్చి, వివరణ కోరారు. రాబోయే రోజుల్లో కూడా తనిఖీలు కొనసాగుతాయని అధికారులు స్పష్టం చేశారు.