గ్లోబల్ క్యాపబిలిటీ సెంటర్ల (జీసీసీ) హబ్‌గా హైదరాబాద్ నగరం తన స్థానాన్ని మరింత పటిష్టం చేసుకుంది. అమెరికాకు చెందిన ప్రముఖ ఫైనాన్షియల్ టెక్నాలజీ, ఆపరేషన్స్ సంస్థ 'ఎస్‌ఈఐ' నగరంలో తన నూతన గ్లోబల్ క్యాపబిలిటీ సెంటర్‌ను ప్రారంభించింది. హైటెక్ సిటీలో 1,200 మంది ఉద్యోగుల సామర్థ్యంతో ఏర్పాటు చేసిన ఈ కేంద్రాన్ని రాష్ట్ర ఐటీ, పరిశ్రమల శాఖ మంత్రి డి. శ్రీధర్ బాబు మంగళవారం ప్రారంభించారు.

సుమారు 1.37 లక్షల చదరపు అడుగుల విస్తీర్ణంలో ఈ సెంటర్‌ను నిర్మించారు. ప్రస్తుతం ఇక్కడ 800 మంది నిపుణులు విధులు నిర్వహిస్తుండగా, భవిష్యత్తులో ఈ సంఖ్యను మరింత పెంచాలని కంపెనీ యోచిస్తోంది. సాఫ్ట్‌వేర్ ఇంజినీరింగ్, ఆర్టిఫిషియల్ ఇంటెలిజెన్స్, డేటా సైన్స్, సైబర్‌ సెక్యూరిటీ వంటి కీలక రంగాలలో ఈ కేంద్రం తమ అంతర్జాతీయ కార్యకలాపాలకు వెన్నెముకగా నిలుస్తుందని కంపెనీ ప్రతినిధులు తెలిపారు.

ఈ సందర్భంగా మంత్రి శ్రీధర్ బాబు మాట్లాడుతూ, దేశానికి ముంబై ఆర్థిక రాజధాని అయితే, ప్రపంచ ఆర్థిక మార్కెట్లకు అవసరమైన సాంకేతికతను హైదరాబాద్ అందిస్తోందని కొనియాడారు. నగరంలో ఇప్పటికే 500కు పైగా జీసీసీలు ఉన్నాయని, కొత్తగా ఏర్పాటవుతున్న బ్యాంకింగ్, ఫైనాన్షియల్ సేవల జీసీసీలలో సగానికి పైగా హైదరాబాద్‌నే తమ గమ్యస్థానంగా ఎంచుకుంటున్నాయని ఆయన పేర్కొన్నారు.

భారత్‌లో అందుబాటులో ఉన్న నైపుణ్యం కలిగిన మానవ వనరుల ద్వారా గత 25 ఏళ్లుగా ప్రయోజనం పొందుతున్నామని, ఆ పునాదిపైనే ఈ జీసీసీని నిర్మించామని ఎస్‌ఈఐ గ్లోబల్ హెడ్ ఆఫ్ ఆపరేషన్స్ బ్రాడ్ లాండిస్ తెలిపారు. ఈ కొత్త కేంద్రం ఏర్పాటుతో వినూత్న ఆవిష్కరణలు మరింత వేగవంతం అవుతాయని కంపెనీ చీఫ్ ఇన్ఫర్మేషన్ ఆఫీసర్ క్రిస్టీ ఎడ్లింగ్-డే ఆశాభావం వ్యక్తం చేశారు.