రాష్ట్రీయ స్వయంసేవక్ సంఘ్ (ఆర్‌ఎస్‌ఎస్) ఆవిర్భవించి దాదాపు 100 సంవత్సరాలు కావస్తున్నా, స్వయంసేవకులే ఇప్పటికీ సంస్థకు అసలైన గుర్తింపు అని ఆర్‌ఎస్‌ఎస్ చీఫ్ మోహన్ భగవత్ పేర్కొన్నారు. మహారాష్ట్రలోని నాగ్‌పూర్‌లో పునరుద్ధరించిన నాగ్‌పూర్ నాగరిక్ సహకారి బ్యాంక్ ప్రధాన కార్యాలయంలో నూతనంగా నిర్మించిన ఆడిటోరియాన్ని ఈరోజు ఆయన ప్రారంభించారు. ఈ సందర్భంగా ఏర్పాటు చేసిన సభలో మోహన్ భగవత్ ప్రసంగించారు.

ఎలాంటి ప్రతిఫలం ఆశించకుండా, నిస్వార్థంగా సమాజ శ్రేయస్సు కోసం పనిచేసేవారే ప్రచారకులని మోహన్ భగవత్ తెలిపారు. ప్రచారకుడికి సంఘమే సర్వస్వమని స్పష్టం చేశారు. 1930లలో ఆర్‌ఎస్‌ఎస్‌పై తొలిసారి నిషేధం విధించేందుకు జరిగిన ప్రయత్నం నాటి చారిత్రక ఘట్టాన్ని ఆయన ఈ సందర్భంగా గుర్తుచేసుకున్నారు.

ఆ రోజుల్లో సెంట్రల్ ప్రావిన్స్ అసెంబ్లీలో సంఘ్‌పై నిషేధం విధించే ప్రయత్నం జరిగినప్పుడు, సభలో ఆర్‌ఎస్‌ఎస్‌ను సమర్థించేందుకు స్వయంసేవకులు గానీ, భావజాల మద్దతుదారులు గానీ ఎవరూ లేరని మోహన్ భగవత్ చెప్పారు. అయితే, ఆ సమయంలో 'ఇబ్రహీం' అనే వ్యక్తి మాత్రమే ఆర్‌ఎస్‌ఎస్‌కు అనుకూలంగా మాట్లాడారని వెల్లడించారు. సంఘ్ మతతత్వ సంస్థ కాదని, దానిని నిషేధించకూడదని ఇబ్రహీం సభలో వాదించారని తెలిపారు.

"ఆ సందర్భంలో ఇబ్రహీం మాట్లాడుతూ హిందుస్థాన్‌ను 'హిందూ రాష్ట్రం' అని పిలిచే వారిని మానసిక ఆసుపత్రికి పంపాలని నేను భావిస్తాను. నాకు డాక్టర్ హెడ్గేవార్ తెలుసు. ఆయన మానసిక సమస్యలు ఉన్న వ్యక్తి కాదు, ఎంతో మంచి వ్యక్తి. కాబట్టి సంఘ్ మతతత్వ సంస్థ కాజాలదు" అని వాదించినట్లు భగవత్ పేర్కొన్నారు.