స్ప్రింగ్ మ్యాట్రెస్ కొనాలనుకుంటున్నారా?.. ఏది బెటర్, ఎలా ఎంచుకోవాలి?

సౌకర్యవంతమైన నిద్ర కోసం మంచి పరుపును ఎంచుకోవడం చాలా ముఖ్యం. మార్కెట్లో అందుబాటులో ఉన్న అనేక రకాల్లో స్ప్రింగ్ పరుపులు ప్రత్యేకమైనవి. ఫోమ్ పరుపులతో పోలిస్తే ఇవి ఎక్కువ గాలి ప్రసరణను అందిస్తూ, కాస్త భిన్నమైన అనుభూతిని ఇస్తాయి. ఆధునిక స్ప్రింగ్ పరుపులు మెటల్ కాయిల్స్‌తో పాటు సౌకర్యం కోసం పైన ఫోమ్ లేదా క్విల్టెడ్ లేయర్లతో వస్తున్నాయి. వీటిని కొనుగోలు చేసే ముందు కొన్ని ముఖ్యమైన విషయాలు తెలుసుకోవడం అవసరం.

స్ప్రింగ్ పరుపుల్లో ప్రధానంగా రెండు రకాలు ఉంటాయి. ఒకటి బోనెల్ స్ప్రింగ్, రెండోది పాకెట్ స్ప్రింగ్. బోనెల్ స్ప్రింగ్ పరుపుల్లో అన్ని కాయిల్స్ ఒకదానికొకటి అనుసంధానమై ఉంటాయి. ఇవి తక్కువ ధరకే లభిస్తాయి కానీ, పరుపుపై ఒక వైపు కదిలినా దాని ప్రభావం మరోవైపు కూడా ఉంటుంది. పాకెట్ స్ప్రింగ్ పరుపుల్లో ప్రతి కాయిల్ (స్ప్రింగ్) విడివిడిగా ఒక ప్యాకెట్‌లో ఉంటుంది. దీనివల్ల కదలికలు ఒకరి నుంచి మరొకరికి వ్యాపించవు. అందువల్ల జంటలకు ఇది బాగా నప్పుతుంది. అయితే, బోనెల్ స్ప్రింగ్‌తో పోలిస్తే వీటి ధర కొంచెం ఎక్కువ.

పరుపు దృఢత్వం (ఫర్మ్‌నెస్) అనేది వ్యక్తిగత సౌకర్యం, నిద్రపోయే భంగిమపై ఆధారపడి ఉంటుంది. చాలా మందికి మీడియం-ఫర్మ్ పరుపులు సరిపోతాయి. వెల్లకిలా లేదా బోర్లా పడుకునే వారికి కొంచెం గట్టిగా ఉండే పరుపు సౌకర్యంగా ఉంటుంది. అదే పక్కకు తిరిగి పడుకునే వారికి మెత్తటి కుషనింగ్ ఉన్న పరుపు ఒంటి నొప్పులను తగ్గిస్తుంది. సాధారణంగా పరుపు కనీసం 6 అంగుళాల మందం ఉండాలని నిపుణులు సూచిస్తున్నారు.

స్ప్రింగ్ పరుపును కొనే ముందు కొన్ని అంశాలను తప్పకుండా పరిశీలించాలి. అందులో ఏ రకమైన స్ప్రింగ్ (బోనెల్ లేదా పాకెట్) వాడారు, సౌకర్యం కోసం అమర్చిన పైపొరలు, వారెంటీ వివరాలు, ముఖ్యంగా పరుపు కుంగిపోతే వారెంటీ వర్తిస్తుందా? లేదా? అని తెలుసుకోవాలి. నాణ్యమైన పాకెట్ స్ప్రింగ్ పరుపులు 8 నుంచి 10 సంవత్సరాల వరకు మన్నిక వస్తాయి. 

అదే బడ్జెట్ ధరలో లభించే బోనెల్ స్ప్రింగ్ పరుపులు త్వరగా పాడయ్యే అవకాశం ఉంది. స్ప్రింగ్ పరుపుల్లో గాలి బాగా ప్రసరించడం వల్ల వేడి సమస్య ఉండదు. అలాగే పరుపు అంచుల వద్ద మంచి సపోర్ట్ లభిస్తుంది. అయితే, కాలక్రమేణా కాయిల్స్ అరిగిపోయి శబ్దం రావడం, కొందరికి ప్రెజర్ పాయింట్స్ ఏర్పడటం వంటి సమస్యలు తలెత్తవచ్చు. చివరిగా బ్రాండ్‌ను బట్టి కాకుండా మీ శరీర తత్వానికి, బడ్జెట్‌కు, సౌకర్యానికి ఏది సరిపోతుందో చూసుకుని ఎంచుకోవడమే ఉత్తమం.