ఆంధ్రప్రదేశ్‌లో జరుగుతున్న ఎంపీటీసీ, జడ్పీటీసీ ఉపఎన్నికల ఓట్ల లెక్కింపులో అధికార కూటమి ప్రభంజనం సృష్టిస్తోంది. ముఖ్యంగా, నెల్లూరు జిల్లాలో మేకపాటి కుటుంబానికి వారి సొంత గ్రామమైన బ్రాహ్మణపల్లిలో గట్టి ఎదురుదెబ్బ తగిలింది. ఇక్కడి ఎంపీటీసీ స్థానాన్ని తెలుగుదేశం పార్టీ అభ్యర్థి కైవసం చేసుకుని సంచలనం సృష్టించారు. అత్యధిక మెజార్టీతో టీడీపీ అభ్యర్థి విజయం సాధించడం మేకపాటి కుటుంబానికి రాజకీయంగా పెద్ద షాక్‌గా మారింది.

రాష్ట్రవ్యాప్తంగా చాలాచోట్ల టీడీపీ, జనసేన, బీజేపీ కూటమి అభ్యర్థులు స్పష్టమైన ఆధిక్యం ప్రదర్శిస్తున్నారు. ఉదయం బ్యాలెట్ బాక్సులను తెరిచి లెక్కింపు ప్రారంభించినప్పటి నుంచి కూటమి హవానే కొనసాగుతోంది. అనేక స్థానాల్లో ఇప్పటికే విజయం సాధించగా, మరికొన్ని చోట్ల ఆధిక్యంలో దూసుకెళ్తున్నారు. కృష్ణా జిల్లాలోని టీడీపీ వ్యవస్థాపకుడు ఎన్టీఆర్ స్వగ్రామం నిమ్మకూరులోనూ టీడీపీ జయభేరి మోగించింది. ఇక్కడ ఎంపీటీసీ అభ్యర్థిగా పోటీ చేసిన మాచర్ల కల్పన 560 ఓట్ల మెజార్టీతో గెలుపొందారు.

నెల్లూరు జిల్లా ఫలితాలు కూడా టీడీపీకి ఉత్సాహాన్నిస్తున్నాయి. జిల్లాలోని 12 ఎంపీటీసీ స్థానాలకు గాను ఒకటి ఏకగ్రీవం కాగా, లెక్కింపు జరిగిన 11 స్థానాల్లో ఐదింటిని టీడీపీ కైవసం చేసుకుంది. మిగిలిన ఆరు స్థానాల్లోనూ టీడీపీ అభ్యర్థులే ఆధిక్యంలో కొనసాగుతున్నారు. నెల్లూరు రూరల్ జడ్పీటీసీ స్థానంలోనూ టీడీపీ అభ్యర్థి స్పష్టమైన ఆధిక్యాన్ని కనబరుస్తున్నారు. మొత్తంగా ఈ ఫలితాలు కూటమి శ్రేణుల్లో కొత్త జోష్ నింపుతున్నాయి.