వైసీపీ ఎమ్మెల్సీ లేళ్ల అప్పిరెడ్డిపై అక్రమ కేసు నమోదు చేయడం దుర్మార్గమైన చర్య అని మాజీ మంత్రి, వైసీపీ నేత అంబటి రాంబాబు తీవ్రస్థాయిలో మండిపడ్డారు. టీడీపీ నేతలు, అధికారులు కుమ్మక్కై ఈ చర్యకు పాల్పడ్డారని ఆరోపించారు. గుంటూరులో మీడియాతో మాట్లాడుతూ ఆయన ఈ వ్యాఖ్యలు చేశారు.

వెంగళాయపాలెంకు చెందిన బ్యాలెట్ బాక్స్‌ను అధికారులు మాయం చేయాలని చూశారని, దీనిని వైసీపీ శ్రేణులు అడ్డుకున్నాయని అంబటి తెలిపారు. న్యాయం కోసం శాంతియుతంగా ధర్నా చేస్తున్న అప్పిరెడ్డితో పాటు ఇతర నేతలపై పోలీసులు లాఠీచార్జ్ చేయడం దారుణమన్నారు. "దోపిడీ చేస్తున్న వారికి రక్షణ కల్పిస్తూ, దానిని అడ్డుకున్న వారికి శిక్ష వేస్తారా? రక్షించాల్సిన పోలీసులే భక్షిస్తుంటే ఏం చేయాలి?" అని ఆయన ప్రభుత్వాన్ని ప్రశ్నించారు.

టీడీపీ నేతలు అప్పిరెడ్డిపై కక్ష సాధింపు చర్యలకు పాల్పడుతున్నారని, అన్యాయాలను అడ్డుకుంటే కేసులు పెడుతున్నారని ధ్వజమెత్తారు. పోలీసుల రక్షణలోనే టీడీపీ నేతలు దౌర్జన్యాలకు పాల్పడుతున్నారని, రాష్ట్రంలో ప్రజలే ఆయుధాలు పట్టుకోవాల్సిన పరిస్థితి వస్తోందని హెచ్చరించారు. అప్పిరెడ్డి అక్రమ అరెస్ట్‌ను ప్రజాస్వామ్యవాదులందరూ ఖండించాలని పిలుపునిచ్చారు.

మరోవైపు, బ్యాలెట్ బాక్స్‌ను దొంగిలించాలని చూసిన పోలింగ్ అధికారిని (పీవో) వెంటనే సస్పెండ్ చేయాలని ఎమ్మెల్సీ అప్పిరెడ్డి డిమాండ్ చేశారు. ఏలేశ్వరంలో సైకిల్ గుర్తుపై గుద్దిన బ్యాలెట్లను అధికారులే కలిపేశారని ఆయన ఆరోపించారు. ఈ ఘటనలతో గుంటూరు జిల్లాలో రాజకీయ వాతావరణం వేడెక్కింది.