అర్నాబ్ అతి తీవ్ర తుపాను ఆంధ్రప్రదేశ్ తీరాన్ని దాటిన నేపథ్యంలో, రాష్ట్ర ప్రభుత్వం సహాయక చర్యలను ముమ్మరం చేసింది. మంత్రులు నారాయణ, ఆనగాని సత్యప్రసాద్ వేర్వేరుగా అధికారులతో సమీక్షలు నిర్వహించి, జనజీవనానికి ఆటంకాలు కలగకుండా చూడాలని ఆదేశించారు. 

పురపాలక శాఖ మంత్రి నారాయణ, తుపాను ప్రభావిత ప్రాంతాల మున్సిపల్ కమిషనర్లతో టెలీకాన్ఫరెన్స్ నిర్వహించారు. రహదారులపై కూలిన చెట్లను యంత్రాల సహాయంతో వెంటనే తొలగించాలని ఆదేశించారు. బలమైన గాలులకు ప్రమాదకరంగా మారే హోర్డింగుల వద్ద జాగ్రత్తలు తీసుకోవాలని సూచించారు. రోడ్లపై, డ్రెయిన్లలో నీరు నిలిచిపోకుండా ఇంజినీరింగ్ సిబ్బంది తక్షణ చర్యలు చేపట్టాలన్నారు. పారిశుద్ధ్య సమస్యలు, తాగునీటి కాలుష్యం వంటివి తలెత్తకుండా చూడాలని స్పష్టం చేశారు.

మరోవైపు, రెవెన్యూ శాఖ మంత్రి ఆనగాని సత్యప్రసాద్ కూడా రెవెన్యూ అధికారులతో టెలీకాన్ఫరెన్స్ ద్వారా పరిస్థితిని సమీక్షించారు. తుపాను ప్రభావిత ప్రాంతాల్లో అధికారులు అప్రమత్తంగా ఉండాలని, నష్టాన్ని ఎప్పటికప్పుడు అంచనా వేస్తూ, ప్రజలకు అసౌకర్యం కలగకుండా ముందస్తు చర్యలు తీసుకోవాలని దిశానిర్దేశం చేశారు.