అర్నబ్ తుపాను సృష్టించిన బీభత్సంతో కాకినాడ జిల్లాలోని ఉప్పాడ తీర ప్రాంతం అతలాకుతలమైంది. ఈ తెల్లవారుజామున విరుచుకుపడిన రాకాసి అలల ధాటికి ఉప్పాడ-కాకినాడ బీచ్ రోడ్డు కొట్టుకుపోగా, సుమారు 30 ఇళ్లు నేలమట్టమయ్యాయి. సముద్రం అల్లకల్లోలంగా మారి అలలు ఉవ్వెత్తున ఎగసిపడటంతో తీరప్రాంత గ్రామాలు వణికిపోయాయి.

తుపాను ప్రభావంతో సుబ్బంపేట, ఉప్పాడ, సూరడపేట, జగ్గరాజుపేట, పల్లిపేట, రంగంపేట, మాయాపట్నం వంటి గ్రామాల్లోకి సముద్రపు నీరు చొచ్చుకొచ్చింది. అలల ఉద్ధృతికి దాదాపు 30 ఇళ్లు పూర్తిగా కూలిపోయాయి. బలమైన గాలులకు మరికొన్ని ఇళ్ల పైకప్పులు కొట్టుకుపోయాయి. సుబ్బంపేట వద్ద తీరప్రాంతాన్ని కాపాడేందుకు నిర్మించిన రక్షణ గోడ సైతం పూర్తిగా ధ్వంసమైంది. రక్షణ కోసం ఏర్పాటు చేసిన భారీ బండరాళ్లు కూడా అలల తాకిడికి చెల్లాచెదురయ్యాయి.

ఉప్పాడ-కాకినాడ బీచ్ రోడ్డు అనేక చోట్ల కోతకు గురైంది. ముఖ్యంగా సుబ్బంపేట వద్ద రోడ్డు పూర్తిగా కొట్టుకుపోవడంతో రాకపోకలు స్తంభించాయి. దీంతో అధికారులు బీచ్ రోడ్డుపై వాహనాల రాకపోకలను పూర్తిగా నిలిపివేశారు. ప్రభావిత ప్రాంతాల్లో అధికారులు సహాయక చర్యలు ముమ్మరం చేశారు. దెబ్బతిన్న ఇళ్లు, రహదారులను పరిశీలిస్తున్నారు. సముద్రం ఇంకా అల్లకల్లోలంగా ఉన్నందున ప్రజలు తీరప్రాంతాలకు వెళ్లవద్దని, అప్రమత్తంగా ఉండాలని హెచ్చరికలు జారీ చేశారు. నష్టాన్ని పూర్తిగా అంచనా వేసిన తర్వాతే బీచ్ రోడ్డుపై ట్రాఫిక్‌ను పునరుద్ధరించనున్నట్లు అధికారులు తెలిపారు.