భారత ఆటోమొబైల్ మార్కెట్లో ఎంతో ఆసక్తిగా ఎదురుచూస్తున్న రెనో డస్టర్ స్ట్రాంగ్-హైబ్రిడ్ వెర్షన్ కారు విడుదల తేదీ ఖరారైంది. ఈ కొత్త మోడల్‌ను అక్టోబర్ 17న అధికారికంగా లాంచ్ చేయనున్నట్లు రెనో ఇండియా ప్రకటించింది. ఈ ఏడాది ప్రారంభంలో మార్కెట్లోకి తిరిగి ప్రవేశించిన డస్టర్ లైనప్‌లో ఇప్పటికే ఉన్న పెట్రోల్, టర్బో-పెట్రోల్ ఇంజిన్ ఆప్షన్లకు ఇది మూడో పవర్‌ట్రెయిన్‌గా అదనంగా చేరనుంది.

ఈ హైబ్రిడ్ ఎస్‌యూవీ 'ఇ-టెక్' బ్రాండింగ్‌తో వస్తోంది. ఇందులో 1.8-లీటర్ ఫోర్-సిలిండర్ నాచురల్లీ ఆస్పిరేటెడ్ పెట్రోల్ ఇంజిన్‌తో పాటు రెండు ఎలక్ట్రిక్ మోటార్లు ఉంటాయి. ఒకటి 49 hp పవర్ గల ట్రాక్షన్ మోటార్ కాగా, మరొకటి 20 hp పవర్ గల ఇంటిగ్రేటెడ్ స్టార్టర్-జనరేటర్. 

ఈ రెండింటి కలయికతో సుమారు 160-162 bhp పవర్, 172 Nm టార్క్ ఉత్పత్తి అవుతుంది. దీనికి 1.4 kWh లిథియం-అయాన్ బ్యాటరీ సపోర్ట్ ఇస్తుంది. ఈ వేరియంట్ కేవలం ఆటోమేటిక్ ట్రాన్స్‌మిషన్‌తో మాత్రమే లభించనుంది.

ఈ కారులో సిరీస్-ప్యారలల్ ఆర్కిటెక్చర్ టెక్నాలజీని ఉపయోగించారు. దీనివల్ల పూర్తిగా ఎలక్ట్రిక్ మోడ్, హైబ్రిడ్ మోడ్, కేవలం ఇంజిన్‌తో నడిచే మోడ్‌లలో ప్రయాణించవచ్చు. 

ముఖ్యంగా నెమ్మదిగా వెళ్తున్నప్పుడు బ్రేకులు వేసినప్పుడు శక్తిని తిరిగి ఉత్పత్తి చేసుకుంటుంది (ఎనర్జీ రికవరీ). సిటీ ట్రాఫిక్‌లో తక్కువ వేగంతో ప్రయాణిస్తున్నప్పుడు ఎక్కువ సేపు ఎలక్ట్రిక్ మోడ్‌లో నడపవచ్చని, తద్వారా ఇంధన సామర్థ్యం గణనీయంగా పెరుగుతుందని రెనో పేర్కొంది.

భారత మార్కెట్లో ఈ డస్టర్ హైబ్రిడ్.. మారుతి గ్రాండ్ విటారా, టయోటా అర్బన్ క్రూయిజర్ హైరైడర్, మారుతి విక్టోరిస్ వంటి స్ట్రాంగ్-హైబ్రిడ్ మోడళ్లకు గట్టి పోటీ ఇవ్వనుంది. వేరియంట్‌ను బట్టి దీని ఎక్స్-షోరూమ్ ధర రూ. 19 లక్షల నుంచి రూ. 23 లక్షల మధ్య ఉండవచ్చని అంచనా వేస్తున్నారు.

లాంచ్‌కు ముందే ఈ ఏడాదికి కేటాయించిన డస్టర్ హైబ్రిడ్ యూనిట్లన్నీ ఇప్పటికే అమ్ముడైపోయాయని రెనో ప్రకటించడం విశేషం. ఈ కారణంగా ప్రీ-బుకింగ్స్‌ను తాత్కాలికంగా నిలిపివేశారు. భవిష్యత్తులో డిమాండ్‌ను బట్టి మళ్లీ బుకింగ్స్ ప్రారంభించే అవకాశం ఉంది.