పాకిస్థాన్ జాతీయ విమానయాన సంస్థ 'పీఐఏ' (పాకిస్థాన్ ఇంటర్నేషనల్ ఎయిర్‌లైన్స్) తమ సిబ్బంది కోసం కొత్త యూనిఫామ్‌లను ఆవిష్కరించే ప్రయత్నం చేయగా, అది తీవ్ర విమర్శలకు దారితీసింది. ముందు యూనిఫామ్‌లు కాదు, విమానాలు, సేవలు మెరుగుపరచండంటూ సోషల్ మీడియాలో ప్రయాణికులు, నెటిజన్లు తీవ్ర ఆగ్రహం వ్యక్తం చేస్తున్నారు.

దశాబ్ద కాలం తర్వాత తమ సిబ్బందికి కొత్త రూపు ఇవ్వాలనే ఉద్దేశంతో పీఐఏ సెప్టెంబర్ 16న ఒక ఫ్యాషన్ షోకేస్ నిర్వహించింది. ఇందులో మహీన్ ఖాన్, దీపక్ పెర్వానీ, హెచ్‌ఎస్‌వై వంటి పాకిస్థాన్‌కు చెందిన 10 మంది ప్రముఖ ఫ్యాషన్ డిజైనర్లు తమ డిజైన్లను ప్రదర్శించారు. పాకిస్థానీ సంస్కృతి, ఆధునికతను మేళవించేలా ఈ డిజైన్లు ఉన్నాయని పీఐఏ పేర్కొంది. ఈ డిజైన్ల నుంచి ఒకదాన్ని విజేతగా ఎంపిక చేసి, భవిష్యత్తులో అధికారిక యూనిఫామ్‌గా ప్రవేశపెడతామని తెలిపింది.

అయితే, ఈ కార్యక్రమంపై ప్రయాణికుల నుంచి తీవ్ర వ్యతిరేకత వ్యక్తమైంది. ‘ముందు విమానాలు సరిచేయండి’, ‘ఫ్లైట్ ఆలస్యాలను ఆపండి’, ‘కనీసం ఏసీ అయినా పనిచేస్తుందా?’ వంటి కామెంట్లతో నెటిజన్లు పీఐఏను నిలదీశారు. 'ఒక ప్రముఖ డిజైనర్ రూపొందించిన యూనిఫామ్‌ ధరించిన ఎయిర్‌హోస్టెస్ వచ్చి నా ఫ్లైట్ ఆలస్యమైందని చెప్పడం కోసం ఎదురుచూస్తున్నా' అంటూ ఒక ప్రయాణికుడు వ్యంగ్యంగా చేసిన పోస్ట్ వైరల్ అయింది.

తీవ్ర ఆర్థిక ఇబ్బందులు, పాతబడిన విమానాలు, సేవల నాణ్యతపై విమర్శలు ఎదుర్కొంటున్న పీఐఏ ఇటీవలే ప్రైవేటీకరణకు గురైంది. కొత్త యాజమాన్యం బ్రాండ్‌ను పునరుద్ధరించే ప్రయత్నాల్లో భాగంగా ఈ ఫ్యాషన్ షోను నిర్వహించినట్లు తెలుస్తోంది. అయితే, ప్రయాణికులు మాత్రం దుస్తుల కంటే ముందు ప్రాథమిక సౌకర్యాలు, కార్యాచరణ సమస్యలను పరిష్కరించాలని డిమాండ్ చేస్తున్నారు. ప్రస్తుతం యూనిఫామ్ ఎంపిక ప్రక్రియ కొనసాగుతుండగా, తుది డిజైన్‌ను ఎప్పుడు అమలు చేస్తారనే దానిపై స్పష్టత రాలేదు.