రిషికేశ్‌లో షాకింగ్ ఘటన.. ఈ వీడియో చూస్తే హెల్మెట్ ధరించడం ఎంత ముఖ్యమో అర్థమవుతుంది!

రోడ్డుపై ప్రశాంతంగా వెళుతున్న ఓ మహిళకు ఊహించని ప్రమాదం ఎదురైంది. రెండు ఎద్దుల మధ్య జరుగుతున్న ఫైటింగ్ కారణంగా ఆమె ప్రమాదానికి గురైంది. రిషికేశ్‌లో జరిగిన ఈ షాకింగ్ ఘటనకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. రోడ్డు భద్రత, ముఖ్యంగా హెల్మెట్ ప్రాధాన్యతపై ఈ సంఘటన తీవ్ర చర్చకు దారితీసింది.

వివరాల్లోకి వెళితే.. రిషికేశ్‌లోని ఓ రహదారి పక్కన రెండు ఎద్దులు తీవ్రంగా కొట్టుకుంటున్నాయి. కొమ్ములతో ఒకదానినొకటి బలంగా నెట్టుకుంటూ, ఆధిపత్యం కోసం తీవ్రంగా కుమ్ముకుంటున్నాయి. ఆ సమయంలో అక్కడే ఉన్న ఓ వ్యక్తి, వాటిని చెదరగొట్ట‌డానికి ప్రయత్నించాడు. అయితే, అతని జోక్యంతో ఆ ఎద్దులలో ఒకటి బెదిరిపోయింది.

ఆ వ్యక్తి నుంచి తప్పించుకునే ప్రయత్నంలో ఆ ఎద్దు గుడ్డిగా రోడ్డుకు అడ్డంగా ఒక్కసారిగా పరుగెత్తింది. అదే సమయంలో ఓ మహిళ తన స్కూటర్‌పై రోడ్డు దాటుతోంది. వేగంగా దూసుకొచ్చిన ఎద్దు నేరుగా ఆమె స్కూటర్‌ను బలంగా ఢీకొట్టింది. ఈ హఠాత్పరిణామానికి ఆమె పూర్తిగా అదుపుతప్పింది. స్కూటర్‌తో సహా పక్కనే పార్క్ చేసి ఉన్న ఓ కారును ఢీకొట్టింది. ఈ ఘటన మొత్తం క్షణాల్లో జరిగిపోయింది.

అన్షుల్ అనే ఇన్‌స్టాగ్రామ్ యూజర్ ఈ భయానక దృశ్యాలను వీడియో తీసి షేర్ చేయడంతో ఈ ఘటన వెలుగులోకి వచ్చింది. ఈ వీడియో చూసిన నెటిజన్లు తీవ్ర ఆందోళన వ్యక్తం చేస్తున్నారు. ఆ మహిళకు ఎంత తీవ్రంగా గాయాలయ్యాయోనని ఆరా తీస్తున్నారు. ద్విచక్ర వాహనం నడిపేటప్పుడు హెల్మెట్ ధరించడం ఎంత ముఖ్యమో ఈ ఘటన మరోసారి గుర్తు చేసిందని పలువురు కామెంట్లు చేశారు. మరికొందరు మాత్రం, అంత పెద్ద ప్రమాదం నుంచి ఆమె అదృష్టవశాత్తు బయటపడిందని అభిప్రాయపడ్డారు. రోడ్లపై ఇలాంటి ఊహించని ప్రమాదాలు ఎప్పుడైనా జరగవచ్చని ఈ సంఘటన హెచ్చరిస్తోందని పేర్కొన్నారు.