న్యూజిలాండ్‌ గడ్డపై భారత క్రికెట్‌ జట్టు మరో విజయానికి సిద్ధమైంది. ఇప్పటికే ఐదు టీ20ల సిరీస్‌ను 3-0తో కైవసం చేసుకున్న టీమిండియా.. రేపు ఆక్లాండ్‌లో జరిగే నాలుగో టీ20లోనూ గెలిచి ఆధిక్యాన్ని 4-0కు పెంచాలని పట్టుదలగా ఉంది. మరోవైపు వరుస పరాజయాలతో సతమతమవుతున్న న్యూజిలాండ్‌.. సత్తా చాటాలని చూస్తోంది. ఈ మ్యాచ్‌లో భారత్‌ గెలుపుతో పాటు జట్టులోని రిజర్వ్‌ ఆటగాళ్లకు అవకాశాలు దక్కుతాయా? అనే ఆసక్తి కూడా నెలకొంది.

కుల్దీప్‌, వరుణ్‌కు అవకాశం దక్కేనా?
సిరీస్‌ ఇప్పటికే భారత్‌ చేతిలోకి రావడంతో తుది జట్టులో ప్రయోగాలు చేసే అవకాశం ఉంది. ముఖ్యంగా స్పిన్నర్లు కుల్దీప్‌ యాదవ్‌, వరుణ్‌ చక్రవర్తికి అవకాశం కల్పించే అంశాన్ని టీమ్‌ మేనేజ్‌మెంట్‌ పరిశీలించవచ్చు. బ్యాటింగ్‌ను ఎనిమిదో స్థానం వరకు బలోపేతం చేస్తూ భారత్‌ ఆడుతున్న విధానం ఇప్పటివరకు మంచి ఫలితాలనే ఇచ్చింది. అయితే నాలుగో టీ20లో అక్షర్‌ పటేల్‌ లేదా అద్భుత ఫామ్‌లో ఉన్న నమన్‌ ధీర్‌కు విశ్రాంతినిస్తే.. కుల్దీప్‌ లేదా వరుణ్‌ తుది జట్టులోకి వచ్చే అవకాశముంది.

న్యూజిలాండ్‌పై కుల్దీప్‌ రికార్డు కూడా అతడికి అనుకూలంగా ఉంది. ముఖ్యంగా గ్లెన్‌ ఫిలిప్స్‌ను ఐదు ఇన్నింగ్స్‌ల్లో నాలుగుసార్లు అవుట్‌ చేశాడు. అక్షర్‌ కూడా ఫిలిప్స్‌ను ఐదుసార్లు పెవిలియన్‌కు పంపాడు. దీంతో భారత స్పిన్నర్ల ఎంపిక ఈ మ్యాచ్‌లో ఆసక్తికరంగా మారింది.

ఈ సిరీస్‌లో భారత బ్యాటర్లు ప్రత్యర్థి బౌలర్లపై విరుచుకుపడుతున్నారు. ముఖ్యంగా అభిషేక్‌ శర్మ విధ్వంసకర ఫామ్‌లో ఉన్నాడు. వెల్లింగ్టన్‌లో కేవలం 35 బంతుల్లోనే సెంచరీ సాధించి న్యూజిలాండ్‌ బౌలర్లకు చుక్కలు చూపించాడు. అంతర్జాతీయ టీ20ల్లో అతడికది నాలుగో సెంచరీ. టీ20 క్రికెట్లో అతడికి 11వ శతకం కాగా, భారత బ్యాటర్లలో టీ20ల్లో అత్యధిక సెంచరీలు సాధించిన ఆటగాడిగా నిలిచాడు.

2025 నుంచి టీ20ల్లో అభిషేక్‌ 200.6 స్ట్రైక్‌రేట్‌తో పరుగులు సాధిస్తుండటం అతడి దూకుడుకు నిదర్శనం. న్యూజిలాండ్‌ బౌలర్లు జాకబ్‌ డఫీ, కైల్‌ జేమీసన్‌పై కూడా అతడు భారీ స్ట్రైక్‌రేట్లతో పరుగులు చేశాడు. మరోవైపు ఇషాన్‌ కిషన్‌ గాయం నుంచి కోలుకోకపోతే వైభవ్‌ సూర్యవంశీకి మరో అవకాశం దక్కవచ్చు. అభిషేక్‌తో కలిసి అతడు ఎలా ఆడతాడన్నది అభిమానుల్లో ఆసక్తి రేపుతోంది.

గాయాలతో న్యూజిలాండ్‌కు కష్టాలు
భారత్‌ను నిలువరించడంలో న్యూజిలాండ్‌ బౌలర్లు విఫలమవుతున్నారు. ఇప్పటికే హెన్రీ అందుబాటులో లేకపోగా, కాలి కండరాల గాయంతో లాకీ ఫెర్గూసన్‌ సిరీస్‌ మొత్తానికి దూరమయ్యాడు. వెల్లింగ్టన్‌లో పవర్‌ప్లేలోనే భారత్‌ రికార్డు స్థాయిలో 118 పరుగులు సాధించడం కివీస్‌ బౌలింగ్‌ వైఫల్యాన్ని స్పష్టం చేసింది.

కెప్టెన్‌ మిచెల్‌ శాంట్నర్‌ బంతితో రాణిస్తున్నా.. మిగతా బౌలర్ల నుంచి తగిన సహకారం లభించడం లేదు. ఆక్లాండ్‌లోని ఈడెన్‌ పార్క్‌ బ్యాటర్లకు అనుకూలంగా ఉండటంతో భారత బ్యాటింగ్‌ను కట్టడి చేయడం కివీస్‌కు పెద్ద సవాలే.

ఈడెన్‌ పార్క్‌లో ప్రేక్షకుల రికార్డు!
ఈ మ్యాచ్‌కు దాదాపు 40 వేల మంది ప్రేక్షకులు హాజరవుతారని అంచనా. న్యూజిలాండ్‌లో ద్వైపాక్షిక సిరీస్‌ మ్యాచ్‌కు ఇదే అత్యధిక ప్రేక్షకుల హాజరుగా నిలిచే అవకాశం ఉంది. 2019లో ఇదే వేదికపై భారత్‌ పురుషుల, మహిళల జట్ల మ్యాచ్‌లకు కలిపి నమోదైన 36,523 మంది హాజరు రికార్డును ఈసారి అధిగమించే అవకాశం ఉంది.

టీ20ల్లో న్యూజిలాండ్‌పై భారత్‌ ఇప్పటివరకు 34 మ్యాచ్‌లు ఆడగా 22 విజయాలు సాధించింది. కివీస్‌పై వరుస విజయాలతో దూసుకెళ్తున్న భారత్‌.. ఈ మ్యాచ్‌లోనూ గెలిస్తే తమ ఆధిపత్యాన్ని మరింత పెంచుకుంటుంది.

మ్యాచ్‌ వివరాలు
  • సమయం: మధ్యాహ్నం 12:30 గంటలకు
  • వేదిక: ఈడెన్‌ పార్క్‌, ఆక్లాండ్‌
  • ప్రత్యక్ష ప్రసారం: సోనీ స్పోర్ట్స్‌ నెట్‌వర్క్‌
  • లైవ్‌ స్ట్రీమింగ్‌: సోనీ లివ్‌ యాప్‌, వెబ్‌సైట్‌