అంతరిక్షంలోకి 13.5 లక్షల మంది పేర్లు.. నాసా సరికొత్త ప్రయోగం!

అమెరికా అంతరిక్ష పరిశోధన సంస్థ 'నాసా' మరో అద్భుత ప్రయోగానికి సిద్ధమైంది. తన నాన్సీ గ్రేస్ రోమన్ స్పేస్ టెలిస్కోప్‌తో పాటు ఏకంగా 13.5 లక్షల మంది పేర్లను అంతరిక్షంలోకి పంపనుంది. ఈ టెలిస్కోప్ భూమి నుంచి దాదాపు పది లక్షల మైళ్ల (1.6 మిలియన్ కిలోమీటర్లు) దూరానికి ప్రయాణించనుంది.

ప్రపంచవ్యాప్తంగా ప్రజలు సమర్పించిన 13,50,144 పేర్లతో కూడిన ఒక మెమరీ కార్డును స్మారక ఫలకంలో అమర్చారు. ఫ్లోరిడాలోని కెన్నడీ స్పేస్ సెంటర్‌లో జులై చివరిలో టెక్నీషియన్లు ఈ ఫలకాన్ని టెలిస్కోప్‌కు విజయవంతంగా బిగించారు. ఈ పేర్లలో ఆర్టెమిస్-2, 3 మిషన్ల వ్యోమగాముల పేర్లు కూడా ఉన్నాయి. నాసా తొలి చీఫ్ ఆస్ట్రానమర్, 'హబుల్ మదర్'గా పేరుగాంచిన డాక్టర్ నాన్సీ గ్రేస్ రోమన్‌కు గౌరవ సూచకంగా ఈ ఫలకాన్ని ఏర్పాటు చేశారు.

సూర్యుడు-భూమి లాగ్రాంజ్ పాయింట్ 2 (L2) వద్ద ఈ రోమన్ టెలిస్కోప్ పనిచేస్తుంది. ప్రస్తుతం జేమ్స్ వెబ్ టెలిస్కోప్ కూడా ఇదే ప్రాంతంలో ఉంది. ఇది హబుల్ టెలిస్కోప్ కంటే దాదాపు 100 రెట్లు పెద్ద వీక్షణను అందించే కెమెరాతో సుదూర గ్రహాలను అన్వేషిస్తుంది. డార్క్ ఎనర్జీ, డార్క్ మ్యాటర్‌పై పరిశోధనలు చేయడంతో పాటు వందల కోట్ల గెలాక్సీలను మ్యాపింగ్ చేస్తుంది.

నాసా, స్పేస్‌ఎక్స్ సంస్థలు కలిసి ఈ టెలిస్కోప్‌ను ఆగస్టు 30న ప్రయోగించడానికి లక్ష్యంగా పెట్టుకున్నాయి. కెన్నడీ స్పేస్ సెంటర్ నుంచి ఫాల్కన్ హెవీ రాకెట్ ద్వారా దీనిని నింగిలోకి పంపనున్నారు. విశ్వాన్ని అన్వేషించే వ్యోమనౌకలపై మానవ గుర్తుగా పేర్లను పంపే సంప్రదాయాన్ని నాసా కొనసాగిస్తోంది.