మార్కెట్ల జోరు.. వారం రోజుల్లో లక్షల కోట్లు ఆర్జించిన దిగ్గజాలు

దేశీయ స్టాక్ మార్కెట్లలో గత వారం బలమైన ర్యాలీ కొనసాగడంతో దేశంలోని టాప్-10 అత్యంత విలువైన కంపెనీలలో తొమ్మిది కంపెనీల సంపద భారీగా పెరిగింది. ఈ కంపెనీలన్నీ కలిసి ఒక్క వారంలోనే తమ మార్కెట్ క్యాపిటలైజేషన్‌లో (మార్కెట్ విలువ) ఏకంగా రూ.2.51 లక్షల కోట్లను జోడించుకున్నాయి. మార్కెట్ సూచీలైన సెన్సెక్స్ 2,034 పాయింట్లు (2.67%), నిఫ్టీ 616 పాయింట్లు (2.59%) లాభపడటం ఈ వృద్ధికి ప్రధాన కారణంగా నిలిచింది.

ఈ వారంలో లాభపడిన దిగ్గజ కంపెనీల జాబితాలో రిలయన్స్ ఇండస్ట్రీస్, భారతీ ఎయిర్‌టెల్, హెచ్‌డీఎఫ్‌సీ బ్యాంక్, ఐసీఐసీఐ బ్యాంక్, స్టేట్ బ్యాంక్ ఆఫ్ ఇండియా (ఎస్‌బీఐ), టాటా కన్సల్టెన్సీ సర్వీసెస్ ( టీసీఎస్‌), బజాజ్ ఫైనాన్స్, లార్సెన్ & టూబ్రో, లైఫ్ ఇన్సూరెన్స్ కార్పొరేషన్ ఆఫ్ ఇండియా (ఎల్ఐసీ) ఉన్నాయి. అయితే, హిందుస్థాన్ యూనిలీవర్ (హెచ్‌యూఎల్‌) మాత్రం ఈ జాబితాలో నష్టాలను చవిచూసిన ఏకైక కంపెనీగా నిలిచింది.

బజాజ్ ఫైనాన్స్‌కు అత్యధిక లాభాలు
అత్యధికంగా లాభపడిన కంపెనీగా బజాజ్ ఫైనాన్స్ రికార్డు సృష్టించింది. ఈ కంపెనీ మార్కెట్ విలువ ఒక్క వారంలోనే రూ.80,345.97 కోట్లు పెరిగి రూ.7,10,817.51 కోట్లకు చేరింది. జూన్‌తో ముగిసిన త్రైమాసికంలో కంపెనీ నికర లాభం 28% పెరగడమే ఈ ర్యాలీకి కారణం. ఈ వార్తతో శుక్రవారం ఒక్కరోజే కంపెనీ షేరు 8% పైగా పెరిగింది.

ఇతర కంపెనీల విషయానికొస్తే.. భారతీ ఎయిర్‌టెల్ మార్కెట్ విలువ రూ.44,959.5 కోట్లు పెరిగి రూ.12,30,005.63 కోట్లకు చేరింది. టీసీఎస్ రూ.40,414.03 కోట్లు, రిలయన్స్ ఇండస్ట్రీస్ రూ.39,447.35 కోట్లు చొప్పున లాభపడ్డాయి. లార్సెన్ & టూబ్రో రూ.21,096.8 కోట్లు, ఎస్‌బీఐ రూ.10,845.97 కోట్లు, హెచ్‌డీఎఫ్‌సీ బ్యాంక్ రూ.8,164.73 కోట్లు, ఎల్ఐసీ రూ.4,427.49 కోట్లు, ఐసీఐసీఐ బ్యాంక్ రూ.1,660.37 కోట్ల మేర తమ మార్కెట్ విలువను పెంచుకున్నాయి. మరోవైపు, హిందుస్థాన్ యూనిలీవర్ మార్కెట్ విలువ రూ.10,326.46 కోట్లు తగ్గి రూ.4,93,602.13 కోట్లకు పడిపోయింది.

వారం ముగిసే నాటికి రిలయన్స్ ఇండస్ట్రీస్ దేశంలోనే అత్యంత విలువైన కంపెనీగా తన అగ్రస్థానాన్ని నిలబెట్టుకుంది. ఆ తర్వాతి స్థానాల్లో వరుసగా భారతీ ఎయిర్‌టెల్, హెచ్‌డీఎఫ్‌సీ బ్యాంక్, ఐసీఐసీఐ బ్యాంక్, ఎస్‌బీఐ ఉన్నాయి.