పొగతాగని వారిలోనూ లంగ్ క్యాన్సర్... మారుతున్న వ్యాధి స్వరూపంపై నిపుణుల హెచ్చరిక

హైదరాబాద్: ఊపిరితిత్తుల క్యాన్సర్ అంటే కేవలం వయసు మళ్లిన, పొగతాగే పురుషులకు మాత్రమే వస్తుందన్న అభిప్రాయం ఇక చెల్లదు. మారుతున్న జీవనశైలి, పెరిగిపోతున్న కాలుష్యం కారణంగా ఈ మహమ్మారి స్వరూపం పూర్తిగా మారిపోతోంది. నేడు (ఆగస్టు 1) ప్రపంచ ఊపిరితిత్తుల క్యాన్సర్ దినోత్సవం సందర్భంగా, దేశవ్యాప్తంగా వైద్య నిపుణులు తీవ్ర ఆందోళన వ్యక్తం చేస్తున్నారు. ధూమపానం అలవాటు లేనివారు, మహిళలు, యువకుల్లో సైతం ఊపిరితిత్తుల క్యాన్సర్ కేసులు గణనీయంగా పెరుగుతున్నాయని వారు హెచ్చరిస్తున్నారు.

గతంలో అరవై ఏళ్లు దాటిన ధూమపానం చేసేవారే తమ వద్దకు వచ్చేవారని, కానీ ఇప్పుడు యువ రోగులు, మహిళలు, సిగరెట్ ముట్టని వారు కూడా క్యాన్సర్ బారిన పడుతున్నారని వైద్య నిపుణుడు డాక్టర్ అక్షయ్ బుధరాజా ఫస్ట్ పోస్ట్ కు తెలిపారు. ఈ మార్పునకు ప్రధాన కారణాలు వాయు కాలుష్యం, ఇంటి లోపలి పొగ, జన్యుపరమైన అంశాలని నిపుణులు విశ్లేషిస్తున్నారు. ముఖ్యంగా నగరాల్లో గాలిలో పెరిగిపోతున్న పీఎం2.5 వంటి సూక్ష్మ ధూళి కణాలు ఊపిరితిత్తుల్లోకి చేరి, దీర్ఘకాలికంగా కణాల నిర్మాణాన్ని దెబ్బతీసి క్యాన్సర్‌కు దారితీస్తున్నాయని చెబుతున్నారు.

టైమ్స్ ఆఫ్ ఇండియా కథనం ప్రకారం, సీఎంఆర్‌ఐ ఆసుపత్రి పల్మనాలజిస్ట్ డాక్టర్ శ్యామ్ కృష్ణన్ మాట్లాడుతూ, "పీఎం2.5 కణాలు ఊపిరితిత్తులలోకి లోతుగా చొచ్చుకెళ్లి దీర్ఘకాలిక వాపు, డీఎన్ఏ నష్టం కలిగిస్తాయి. అనేక భారతీయ నగరాల్లో గాలి నాణ్యత ప్రమాదకర స్థాయికి పడిపోవడంతో, పొగతాగని వారిలోనూ క్యాన్సర్ ముప్పు పెరుగుతోంది" అని వివరించారు. ఇదే విషయాన్ని చార్నాక్ హాస్పిటల్ పల్మనాలజీ హెడ్ డాక్టర్ సౌమ్య సేన్‌గుప్తా కూడా ధ్రువీకరించారు. గ్రామీణ ప్రాంతాల్లో వంట కోసం కట్టెల పొయ్యిల వాడకం, పరిశ్రమల సమీపంలో నివసించడం కూడా క్యాన్సర్ ముప్పును పెంచుతున్నాయని ఆయన తెలిపారు.

భారతీయులు, ముఖ్యంగా ఆసియా జనాభాలో ఉండే EGFR, ALK వంటి ప్రత్యేక జన్యుపరమైన మార్పులు కూడా ఈ క్యాన్సర్‌కు ఒక ముఖ్య కారణమని రూబీ జనరల్ హాస్పిటల్ ఆంకాలజిస్ట్ డాక్టర్ సంజోయ్ రాయ్ పేర్కొన్నారు. కాలుష్యం, ఒత్తిడి వంటివి ఈ జన్యు మార్పులను ప్రేరేపించి క్యాన్సర్‌గా మారుస్తున్నాయని ఆయన అభిప్రాయపడ్డారు. దేశంలో నమోదవుతున్న ఊపిరితిత్తుల క్యాన్సర్ కేసుల్లో 30% నుంచి 50% పొగతాగని వారిలోనే ఉంటున్నాయని పలు అధ్యయనాలు స్పష్టం చేస్తున్నాయి. ముఖ్యంగా మహిళల్లో ఈ సంఖ్య మరింత ఎక్కువగా ఉంది.

చాలా సందర్భాల్లో, నిరంతరంగా పొడి దగ్గు వస్తున్నా దాన్ని సాధారణ సమస్యగా భావించి నిర్లక్ష్యం చేయడం వల్ల వ్యాధి ముదిరిపోతోంది. కర్ణాటకలో జరిగిన ఒక అధ్యయనంలో, 50 ఏళ్లలోపు పొగతాగని మహిళల్లో దాదాపు 70% మందికి వ్యాధి చివరిదశలో (స్టేజ్ IV) ఉన్నప్పుడు నిర్ధారణ అయినట్లు తేలింది. ఈ నేపథ్యంలో, పొగతాగే అలవాటు లేనప్పటికీ, దీర్ఘకాలిక దగ్గు, ఆయాసం వంటి లక్షణాలు కనిపిస్తే వెంటనే వైద్యులను సంప్రదించడం అత్యవసరమని నిపుణులు సూచిస్తున్నారు.

అందుబాటులోకి అధునాతన చికిత్సలు
అయితే, క్యాన్సర్ చికిత్సలో వస్తున్న విప్లవాత్మక మార్పులు రోగులకు కొత్త ఆశలు కల్పిస్తున్నాయి.  సర్జికల్ ఆంకాలజిస్ట్ డాక్టర్ పళనియప్పన్ రామనాథన్ మాట్లాడుతూ "గతంలోలా 'అందరికీ ఒకే రకమైన చికిత్స' కాకుండా, ఇప్పుడు 'ప్రెసిషన్ మెడిసిన్' అందుబాటులోకి వచ్చింది. జన్యు పరీక్షల ద్వారా క్యాన్సర్ కణాల్లోని మార్పులను గుర్తించి, వాటికి అనుగుణంగా టార్గెటెడ్ థెరపీలు, ఇమ్యునోథెరపీ వంటివి అందిస్తున్నాం. వీటితో దుష్ప్రభావాలు తక్కువగా ఉండి, ఫలితాలు మెరుగ్గా ఉంటున్నాయి" అని తెలిపారు. టైర్-2 నగరాల్లో క్యాన్సర్ అంటే మరణమే అనే అపోహతో చాలామంది చికిత్సకు వెనుకంజ వేస్తున్నారని, కానీ వీడియో-అసిస్టెడ్ థొరాకోస్కోపిక్ సర్జరీ, రోబోటిక్ సర్జరీ వంటి అధునాతన శస్త్రచికిత్సలతో సులువైన చికిత్స సాధ్యమవుతోందని వైద్యులు చెబుతున్నారు.

ప్రపంచ ఊపిరితిత్తుల క్యాన్సర్ దినోత్సవం సందర్భంగా వైద్యులు ఒకటే మాట చెబుతున్నారు. దీర్ఘకాలంగా వేధించే శ్వాసకోశ సమస్యలను ఎట్టిపరిస్థితుల్లోనూ నిర్లక్ష్యం చేయవద్దు. తొలిదశలో వ్యాధిని గుర్తిస్తే, అధునాతన చికిత్సలతో దీనిని ప్రాణాంతక వ్యాధిగా కాకుండా, దీర్ఘకాలిక వ్యాధిగా నియంత్రించవచ్చని భరోసా ఇస్తున్నారు.