పావలా శ్యామల మృతిపై పవన్ కల్యాణ్ స్పందన

ప్రముఖ సీనియర్ నటి, క్యారెక్టర్ ఆర్టిస్ట్ పావలా శ్యామల మృతి పట్ల ఆంధ్రప్రదేశ్ ఉపముఖ్యమంత్రి, ప్రముఖ సినీ నటుడు పవన్ కల్యాణ్ సంతాపం వ్యక్తం చేశారు. గత కొంతకాలంగా అనారోగ్యంతో బాధపడుతున్న ఆమె, హైదరాబాద్‌లోని ఉస్మానియా జనరల్ ఆసుపత్రిలో చికిత్స పొందుతూ మంగళవారం తెల్లవారుజామున తుదిశ్వాస విడిచారు. తీవ్రమైన గుండెపోటు రావడంతో ఆమె మరణించినట్లు ఆసుపత్రి వర్గాలు ధృవీకరించాయి.

ఆమె మృతిపై పవన్ కల్యాణ్ తన సామాజిక మాధ్యమ వేదిక 'ఎక్స్' ద్వారా స్పందిస్తూ, పావలా శ్యామల ఆత్మకు శాంతి చేకూరాలని ఆకాంక్షించారు. "నటి శ్రీమతి పావలా శ్యామల గారు కన్నుమూశారని తెలిసి ఎంతో చింతించాను. శ్యామల గారు రంగస్థలంపై అద్భుతమైన ప్రదర్శనలతో ప్రశంసలు అందుకుని, చిత్ర పరిశ్రమలోనూ తనకంటూ ప్రత్యేక గుర్తింపు తెచ్చుకున్నారు. ఆమె ఆత్మకు శాంతి చేకూరాలని భగవంతుణ్ణి ప్రార్థిస్తున్నాను" అని ఆయన పేర్కొన్నారు.

గుంటూరు జిల్లా అమరావతిలో 1951లో జన్మించిన ఆమె అసలు పేరు నేతి శ్యామల. నాటకరంగం నుంచి సినీ పరిశ్రమలోకి అడుగుపెట్టిన ఆమె, 1985లో 'బాబాయ్ అబ్బాయ్' చిత్రంతో వెండితెరకు పరిచయమయ్యారు. తన నాలుగు దశాబ్దాల సినీ ప్రయాణంలో ఎన్నో విలక్షణమైన పాత్రలు పోషించి నటిగా గుర్తింపు పొందారు. ముఖ్యంగా ఖడ్గం, వర్షం, స్వర్ణకమలం, గోలీమార్, మత్తు వదలరా వంటి చిత్రాల్లో ఆమె నటన ప్రేక్షకులను విశేషంగా ఆకట్టుకుంది.