భారత యువ సంచలనం వైభవ్ సూర్యవంశీకి శ్రీలంకలో జరుగుతున్న ముక్కోణపు ఏ-సిరీస్‌లో నిరాశ ఎదురైంది. మంగళవారం శ్రీలంక-ఏ జట్టుతో జరిగిన తొలి మ్యాచ్‌లో ఈ ఎడమచేతి వాటం ఓపెనర్ విఫలమయ్యాడు. ఇన్నింగ్స్ ప్రారంభంలో వరుసగా 4, 4, 4 బాది మంచి ఊపుమీద కనిపించినప్పటికీ నాలుగో ఓవర్‌లోనే పెవిలియన్ చేరి అభిమానులను తీవ్ర నిరాశకు గురిచేశాడు.

రెండో ఓవర్‌లోనే రెండు ఫోర్లతో ఖాతా తెరిచిన వైభవ్, మూడో ఓవర్ మొదటి బంతికే మరో ఫోర్ కొట్టి క్రీజ్‌లో నిలదొక్కుకున్నట్లు కనిపించాడు. అయితే లంక బౌలర్ మహ్మద్ షిరాజ్ వేసిన ఫుల్లర్ లెంగ్త్ బంతిని భారీ షాట్ ఆడబోగా బ్యాట్ చేతిలో తిరగడంతో మిడ్-ఆఫ్ ఫీల్డర్ డైవ్ చేస్తూ అద్భుత క్యాచ్‌ పట్టుకున్నాడు. దీంతో కేవలం 12 పరుగులకే వైభవ్ ఇన్నింగ్స్ ముగిసింది. దీంతో భారీ ఆశలతో బరిలోకి దిగిన ఇండియా-ఏ జట్టుకు గట్టి షాక్ తగిలింది.

ఇటీవలే భారత సీనియర్ టీ20 జట్టుకు ఎంపికైన వైభవ్‌కు లంకలోని నెమ్మది పిచ్‌లపై ఆడటం ఒక సవాల్ అని ఇండియా-ఏ కెప్టెన్ తిలక్ వర్మ మ్యాచ్‌కు ముందు పేర్కొన్నాడు. ఈ ఏడాది జరిగిన అండర్-19 వరల్డ్ కప్‌లో భారత్ విజేతగా నిలవడంలో వైభవ్ వన్డే ఫార్మాట్‌లో అద్భుతంగా రాణించాడని గుర్తుచేశాడు. ఈ సిరీస్‌లో భారత్, శ్రీలంకతో పాటు ఆఫ్ఘనిస్థాన్ కూడా ఆడుతోంది. రాబోయే మ్యాచ్‌ల్లో వైభవ్ కచ్చితంగా పుంజుకుంటాడని జట్టు యాజమాన్యం ఆశాభావం వ్యక్తం చేస్తోంది.