ద్రవిడ్, మిథాలీ, రోజర్ బిన్నీలకు బీసీసీఐ లైఫ్ టైమ్ అచీవ్ మెంట్ అవార్డులు

భారత క్రికెట్‌కు విశేష సేవలందించిన దిగ్గజాలకు బీసీసీఐ అత్యున్నత గౌరవాన్ని అందించనుంది. ప్రతిష్ఠాత్మక 'నమన్ అవార్డులు-2026'లో భాగంగా టీమిండియా మాజీ ఆటగాళ్లు రాహుల్ ద్రవిడ్, రోజర్ బిన్నీలతో పాటు మహిళా క్రికెట్ ఐకాన్ మిథాలీ రాజ్‌కు జీవిత సాఫల్య పురస్కారాలు ప్రకటించింది. న్యూఢిల్లీలో మార్చి 15వ తేదీన ఈ అవార్డుల ప్రదానోత్సవం జరగనుంది.

పురుషుల విభాగంలో బీసీసీఐ అత్యున్నత పురస్కారమైన 'కల్నల్ సీకే నాయుడు జీవిత సాఫల్య పురస్కారా'న్ని రాహుల్ ద్రవిడ్, రోజర్ బిన్నీలకు అందజేయనున్నారు. మహిళల క్రికెట్‌కు మిథాలీ రాజ్ చేసిన విశేష సేవలకు గాను ఆమెకు 'బీసీసీఐ జీవిత సాఫల్య పురస్కారా'న్ని బహూకరించనున్నారు. ఆటగాళ్లుగా, కోచ్‌లుగా, నిర్వాహకులుగా భారత క్రికెట్ ఎదుగుదలకు వీరు అందించిన సేవలను బీసీసీఐ ఈ పురస్కారాల ద్వారా గుర్తించింది.

వీరితో పాటు 2024-25 సీజన్‌కు గాను ప్రస్తుత ఆటగాళ్లకు కూడా అవార్డులు ప్రకటించారు. టీమిండియా కెప్టెన్ శుభ్‌మన్ గిల్ రెండోసారి 'పాలి ఉమ్రిగర్ అవార్డు' (ఉత్తమ అంతర్జాతీయ క్రికెటర్ - పురుషులు) అందుకోనుండగా, స్మృతి మంధానా ఐదోసారి ఉత్తమ అంతర్జాతీయ మహిళా క్రికెటర్‌గా నిలిచారు.

ఈ ఏడాది నమన్ అవార్డుల వేడుకలో ఒక చారిత్రక ఘట్టం ఆవిష్కృతం కానుంది. ఇటీవల ఐసీసీ ట్రోఫీలు గెలిచిన ఐదు భారత జట్లను (సీనియర్ పురుషుల, మహిళల, అండర్-19 జట్లు) బీసీసీఐ ఒకే వేదికపై ఘనంగా సత్కరించనుంది. అదేవిధంగా, దేశవాళీ క్రికెట్‌లో రాణించిన పలువురు ఆటగాళ్లతో పాటు, ఉత్తమ ప్రదర్శన కనబరిచినందుకు ముంబై క్రికెట్ అసోసియేషన్‌కు కూడా అవార్డు అందజేయనున్నారు.