కొత్త నటీనటులకు రిషబ్ శెట్టి ఛాన్స్.. బెంగళూరులో ఓపెన్ ఆడిషన్స్

‘కాంతార’తో దేశవ్యాప్తంగా గుర్తింపు తెచ్చుకున్న నటుడు, దర్శకుడు రిషబ్ శెట్టి తన నిర్మాణ సంస్థ ద్వారా కొత్త సినిమా కోసం ఓపెన్ కాస్టింగ్ కాల్ ప్రకటించారు. సినిమా రంగంలో అడుగుపెట్టాలని ఆశించే కొత్త ప్రతిభకు ఈ ఆడిషన్ ఒక అవకాశం కానుంది. ఆడిషన్లు అక్టోబర్ 2న బెంగళూరులోని విజయా కాలేజీలో నిర్వహించనున్నారు. పురుషులకు 20 నుంచి 65 ఏళ్లు, మహిళలకు 20 నుంచి 60 ఏళ్ల వయోపరిమితి నిర్ణయించారు. ఆసక్తి ఉన్నవారు రెజ్యూమ్, ప్రొఫైల్, గత పనులకు సంబంధించిన లింకులను rrrfilmz@gmail.comకు పంపవచ్చు.రిషబ్ శెట్టి తన అధికారిక ఎక్స్ ఖాతా ద్వారా ఈ వివరాలను పంచుకున్నారు. 

తన నిర్మాణ సంస్థ రిషబ్ శెట్టి ఫిల్మ్స్ చేపడుతున్న కొత్త ప్రాజెక్ట్ కోసం విభిన్న పాత్రలకు సరిపోయే కొత్త ముఖాలను ఎంపిక చేయనున్నట్లు పేర్కొన్నారు. సినిమాల్లో నటించాలనే కల ఉన్నవారు తమ ప్రతిభను చూపించేందుకు ఇది మంచి వేదికగా మారనుంది. అర్హతలు, ఎంపిక ప్రక్రియ, ఇతర తాజా సమాచారాన్ని రిషబ్ శెట్టి అధికారిక సోషల్ మీడియా ఖాతాల ద్వారా తెలుసుకోవాలని నిర్వాహకులు సూచించారు.