మేనల్లుడు సిద్ధార్థ్ గల్లా పెళ్లి.. వారణాసి షూటింగ్‌కు మహేశ్ బాబు విరామం?

సూపర్ స్టార్ మహేశ్ బాబు తన తాజా భారీ చిత్రం ‘వారణాసి’ షూటింగ్ నుంచి కొద్దిరోజుల పాటు చిన్న విరామం తీసుకోనున్నట్లు తెలుస్తోంది. తన మేనల్లుడు సిద్ధార్థ్ గల్లా వివాహ వేడుకకు హాజరయ్యేందుకు ఆయన చిత్రీకరణకు తాత్కాలికంగా బ్రేక్ ఇవ్వనున్నట్లు సమాచారం. ఈ మేరకు సోషల్ మీడియాలో వార్తలు విస్తృతంగా చక్కర్లు కొడుతున్నాయి.

దర్శకధీరుడు ఎస్ఎస్ రాజమౌళి దర్శకత్వంలో అంతర్జాతీయ ప్రమాణాలతో అత్యంత ప్రతిష్ఠాత్మకంగా రూపుదిద్దుకుంటున్న ‘వారణాసి’ చిత్రంలో మహేశ్ బాబు ప్రస్తుతం నటిస్తున్నారు. ప్రస్తుతం ఈ సినిమా చిత్రీకరణ శరవేగంగా సాగుతోంది. అయితే, కుటుంబంలో అత్యంత ముఖ్యమైన వేడుక జరగనుండటంతో మహేశ్ బాబు కొన్ని రోజుల పాటు షూటింగ్ పనులను పక్కనపెట్టి పెళ్లి వేడుకల్లో పాల్గొనేందుకు సిద్ధమవుతున్నట్లు తెలుస్తోంది.

ఇప్పటికే సిద్ధార్థ్ గల్లా పెళ్లికి సంబంధించిన ప్రీ-వెడ్డింగ్ వేడుకలు ఘనంగా ప్రారంభమయ్యాయి. మహేశ్ బాబు అర్ధాంగి నమ్రతా శిరోద్కర్ ఈ వేడుకలకు సంబంధించిన ఫొటోలను ఇటీవల తన ఇన్‌స్టాగ్రామ్ ఖాతా ద్వారా పంచుకున్నారు. దీంతో మహేశ్ బాబు కూడా త్వరలోనే ఈ వేడుకలకు హాజరవుతారన్న ప్రచారానికి బలం చేకూరింది.

ఇక ‘వారణాసి’ సినిమా విషయానికొస్తే, ఈ చిత్రంపై ప్రపంచవ్యాప్తంగా భారీ అంచనాలు నెలకొన్నాయి. గతంలో విడుదలైన ఫస్ట్ లుక్ పోస్టర్‌లో మహేశ్ బాబు ఎద్దుపై కూర్చుని, చేతిలో త్రిశూలం పట్టుకున్న పవర్‌ఫుల్ లుక్‌లో కనిపించి అభిమానులను విపరీతంగా ఆకట్టుకున్నారు. ఈ సినిమాలో గ్లోబల్ స్టార్ ప్రియాంక చోప్రా, మలయాళ నటుడు పృథ్వీరాజ్ సుకుమారన్ కీలక పాత్రల్లో నటిస్తున్నారు. ఈ భారీ ప్రాజెక్ట్‌ను 2027 ఏప్రిల్ 7న ప్రపంచవ్యాప్తంగా ప్రేక్షకుల ముందుకు తీసుకురావడానికి చిత్ర యూనిట్ సన్నాహాలు చేస్తోంది. వివాహ వేడుక పూర్తయిన వెంటనే మహేశ్ బాబు తిరిగి ‘వారణాసి’ సెట్స్‌లో జాయిన్ కానున్నట్లు తెలుస్తోంది.