పాక్ వెళ్లేందుకు పంజాబ్ సీఎంకు కేంద్రం అనుమతి కష్టమే

పాకిస్థాన్‌లోని లాహోర్‌లో జరగనున్న అంతర్జాతీయ పంజాబీ సదస్సుకు హాజరయ్యేందుకు పంజాబ్ ముఖ్యమంత్రి భగవంత్ మాన్‌కు కేంద్ర ప్రభుత్వం అనుమతి ఇచ్చే అవకాశం కనిపించడం లేదు. పాకిస్థాన్‌తో సంబంధాల విషయంలో భారత్‌కు ఒక స్పష్టమైన ‘జాతీయ విధానం’ ఉందని, ప్రముఖులందరూ దీనికి కట్టుబడి ఉండాలని భారత విదేశాంగ శాఖ స్పష్టం చేసింది.

లాహోర్‌లోని పంజాబ్ ఇన్‌స్టిట్యూట్ ఆఫ్ లాంగ్వేజ్, ఆర్ట్ అండ్ కల్చర్‌లో నవంబర్ 27 నుంచి 29 వరకు 4వ అంతర్జాతీయ పంజాబీ కాన్ఫరెన్స్ జరగనుంది. ఈ కార్యక్రమానికి ముఖ్య అతిథిగా హాజరుకావాలంటూ ‘పంజాబీ పర్చార్’ అనే సంస్థ అక్టోబర్ 25న భగవంత్ మాన్‌కు ఆహ్వానం పంపింది. కేంద్ర ప్రభుత్వ నిబంధనల ప్రకారం ముఖ్యమంత్రులు విదేశీ పర్యటనలకు వెళ్లాలంటే కేంద్ర విదేశాంగ శాఖ నుంచి ముందస్తు రాజకీయ అనుమతి (పొలిటికల్ క్లియరెన్స్) తప్పనిసరి. ఇందుకు సంబంధించి తమ కార్యాలయం అధికారిక పత్రాలను సిద్ధం చేస్తోందని, కేంద్రం నిర్ణయం కోసం వేచి చూస్తామని సీఎం మాన్ ఇటీవల తెలిపారు.

ఈ అంశంపై విదేశాంగ శాఖ అధికార ప్రతినిధి రణధీర్ జైస్వాల్ స్పందించారు. "విదేశాలతో సంబంధాల విషయానికి వస్తే మాకు ఒక జాతీయ విధానం ఉంది. ప్రతి ఒక్కరూ దానికి కట్టుబడి ఉంటారని ఆశిస్తున్నాం" అని పేర్కొన్నారు. ప్రముఖుల విదేశీ పర్యటనలకు సంబంధించిన అనుమతులపై ప్రభుత్వ విదేశాంగ విధానానికి అనుగుణంగా నిర్ణయం తీసుకుంటామని చెప్పారు. ముఖ్యంగా పహల్గామ్ ఉగ్రదాడి తర్వాత పాకిస్థాన్ పట్ల భారత్ వైఖరి ఏంటో అందరికీ స్పష్టంగా తెలుసని ఆయన వ్యాఖ్యానించారు.

పంజాబ్ ప్రభుత్వం ఇంకా అధికారికంగా అనుమతి కోరుతూ దరఖాస్తు చేయనప్పటికీ, విదేశాంగ శాఖ చేసిన ఈ వ్యాఖ్యలను బట్టి భగవంత్ మాన్ లాహోర్ పర్యటనకు కేంద్రం నుంచి అనుమతి లభించడం దాదాపు అసాధ్యమని స్పష్టమవుతోంది.