కేరళంలో కలకలం రేపుతున్న షిగెల్లా బ్యాక్టీరియా.. మలప్పురంలో హై అలర్ట్

కేరళంలోని మలప్పురం జిల్లాలో షిగెల్లా బ్యాక్టీరియా కలకలం రేపుతోంది. జిల్లాలోని మూడు ప్రాంతాల్లో ఈ ఇన్ఫెక్షన్‌ నిర్ధారణ కావడంతో ఆరోగ్యశాఖ అప్రమత్తమైంది. ఈ ఏడాది ఇప్పటివరకు జిల్లాలో 75 కేసులు నమోదయ్యాయి. వీరిలో ఎనిమిది మంది బాధితులతో సన్నిహిత సంబంధాలు ఉన్నవారికి కూడా ఇన్ఫెక్షన్‌ సోకినట్లు అధికారులు వెల్లడించారు. వ్యాధి వ్యాప్తిని అడ్డుకునేందుకు నిఘా పెంచడంతో పాటు పలు నివారణ చర్యలు చేపట్టారు.

మలప్పురం జిల్లాలోని అరీకోడ్‌, పుల్పట్ట, ఎడవన్న ప్రాంతాల్లో తాజాగా షిగెల్లా కేసులు వెలుగుచూశాయి. దీంతో జిల్లా స్థాయి ర్యాపిడ్‌ రెస్పాన్స్‌ టీమ్‌ అత్యవసర సమావేశం నిర్వహించి పరిస్థితిని సమీక్షించింది. వ్యాధి మరింత విస్తరించకుండా తీసుకోవాల్సిన చర్యలపై చర్చించింది.

కలుషిత ఆహారం, నీటితో వ్యాప్తి
షిగెల్లా అనేది బ్యాక్టీరియా వల్ల వచ్చే పేగుల ఇన్ఫెక్షన్‌. ముఖ్యంగా పిల్లల్లో ఈ వ్యాధి ఎక్కువగా కనిపిస్తుంది. కలుషిత నీరు, నిల్వ ఉంచిన ఆహారం, సరిగా ఉడకని పదార్థాలు తీసుకోవడం వల్ల వ్యాధి సోకుతుంది. బాధితుల మలంతో ప్రత్యక్షంగా లేదా పరోక్షంగా సంబంధం ఏర్పడినా ఇన్ఫెక్షన్‌ వ్యాపించే ప్రమాదం ఉంది. లక్షణాలు సాధారణంగా ఇన్ఫెక్షన్‌ సోకిన ఒకటి, రెండు రోజుల్లో కనిపిస్తాయి.

ఈ లక్షణాలుంటే అప్రమత్తం
విరేచనాలు, మలంలో రక్తం లేదా చీము, తీవ్రమైన కడుపునొప్పి, జ్వరం, వాంతులు, శరీరంలో నీరు తగ్గిపోవడం ఈ వ్యాధి ప్రధాన లక్షణాలు. లక్షణాలు కనిపించని బాధిత పిల్లల నుంచి కూడా మలం ద్వారా బ్యాక్టీరియా ఇతరులకు వ్యాపించవచ్చని జిల్లా వైద్యాధికారి డాక్టర్‌ వి. వినోద్‌ హెచ్చరించారు. చికిత్స ఆలస్యమైతే మెదడు, మూత్రపిండాలపై తీవ్ర ప్రభావం పడొచ్చని, కొన్ని సందర్భాల్లో ప్రాణాపాయం కూడా ఉంటుందని తెలిపారు.

బహిరంగ విందులపై నిషేధం
వ్యాధి ప్రభావిత ప్రాంతాల్లో బహిరంగ విందులను తాత్కాలికంగా నిషేధించారు. ఆరోగ్యశాఖ, స్థానిక స్వపరిపాలన శాఖ, ఆహార భద్రత విభాగం సంయుక్తంగా ఆహార తయారీ, నిల్వ, పంపిణీ కేంద్రాల్లో తనిఖీలు నిర్వహించనున్నాయి. నిబంధనలు ఉల్లంఘించిన సంస్థలపై కఠిన చర్యలు తీసుకుంటామని అధికారులు హెచ్చరించారు.

ఈ జాగ్రత్తలు తప్పనిసరి
తాగడానికి, వంటకు కాచి చల్లార్చిన నీటినే ఉపయోగించాలని ఆరోగ్యశాఖ సూచించింది. తాజాగా తయారు చేసిన, పూర్తిగా ఉడికించిన ఆహారాన్నే తీసుకోవాలి. నిల్వ ఆహారం, మూతలేకుండా ఉంచిన పదార్థాలు, బయట దొరికే ఆహారానికి దూరంగా ఉండాలి. తాగునీటి వనరులను క్రమం తప్పకుండా క్లోరినేషన్‌ చేయాలి. పండ్లు, కూరగాయలను శుభ్రంగా కడగాలి. భోజనానికి ముందు, వంట చేసే ముందు, మరుగుదొడ్డికి వెళ్లి వచ్చిన తర్వాత సబ్బుతో చేతులు కడుక్కోవాలి.

విరేచనాలు మొదలైతే వెంటనే ఓఆర్‌ఎస్‌ ద్రావణం, ఉప్పు కలిపిన గంజి లేదా కొబ్బరినీళ్లు ఇవ్వాలని అధికారులు సూచించారు. లక్షణాలు కనిపిస్తే సొంత వైద్యం చేసుకోకుండా వెంటనే వైద్యులను సంప్రదించాలని కోరారు.