దేశంలో 96 శాతం మంది ముస్లింలు.. కానీ, హిజాబ్‌పై ఆంక్షలు: రోడ్డెక్కిన విద్యార్థినిలు!

అజర్‌బైజాన్‌లో పాఠశాల యూనిఫాం నిబంధనల్లో చేసిన ఒక మార్పు తీవ్ర వివాదానికి, ఉద్రిక్తతలకు దారితీసింది. 2026 సెప్టెంబర్ 21న ఆ దేశ కేబినెట్ ఆఫ్ మినిస్టర్స్ చేసిన సవరణల ప్రకారం.. పాఠశాలల్లో హిజాబ్ ధరించిన విద్యార్థినులు, ఉపాధ్యాయులను లోపలికి అనుమతించడం లేదు. ఈ నిబంధన ఎక్కడా హిజాబ్‌ను నేరుగా నిషేధించకపోయినా 'లౌకిక విద్యా సూత్రాలకు విరుద్ధమైన' దుస్తులను అనుమతించబోమని పేర్కొంది. దీని ఫలితంగా, దేశవ్యాప్తంగా అనేక పాఠశాలల్లో హిజాబ్ ధరించిన వారిని గేటు వద్దే నిలిపేశారు.

ఈ పరిణామంపై అజర్‌బైజాన్‌లో తీవ్ర వ్యతిరేకత వ్యక్తమవుతోంది. ప్రభుత్వ నిర్ణయాన్ని నిరసిస్తూ విద్యార్థులు, వారి తల్లిదండ్రులు ఆందోళనలు చేపట్టారు. పలుచోట్ల విద్యార్థులు తరగతులను బహిష్కరించారు. పాఠశాలల్లోకి అనుమతించకపోవడంతో కన్నీరు పెట్టుకుంటున్న విద్యార్థినుల వీడియోలు సోషల్ మీడియాలో వైరల్ అవుతున్నాయి. కొందరు టీచర్లు విద్యార్థులకు సంఘీభావంగా పాఠశాల బయటే తరగతులు నిర్వహిస్తున్నారు.

ప్రభుత్వ మీడియా ఏజెన్సీ కథనం ప్రకారం.. లౌకిక సూత్రాలకు అనుగుణంగా యూనిఫాంలను ప్రామాణీకరించడానికే ఈ మార్పులు చేశామని ప్రభుత్వం చెబుతోంది. ఈ నిరసనల నేపథ్యంలో శాంతిభద్రతలకు విఘాతం కలిగించారన్న ఆరోపణలతో 37 మందిని అరెస్ట్ చేసినట్లు అధికారులు తెలిపారు.

రాజ్యాంగం ప్రకారం అజర్‌బైజాన్ లౌకిక దేశమే అయినా.. జనాభాలో సుమారు 96 శాతం మంది ముస్లింలు ఉన్నారు. ఈ నేపథ్యంలో మత స్వేచ్ఛను, విద్యా హక్కును ఈ నిబంధనలు కాలరాస్తున్నాయని విమర్శకులు ఆరోపిస్తున్నారు. ఈ వివాదంపై టర్కీ మాజీ సీహెచ్‌పీ నేత కెమల్ కిలిసిదరోగ్లు స్పందించారు. ఒకప్పుడు టర్కీలో కూడా ఇలాంటి ఆంక్షలు ఉండేవని గుర్తుచేస్తూ, మహిళలు తమ దుస్తులను ఎంచుకునే స్వేచ్ఛను ఇవ్వాలని అజర్‌బైజాన్ ప్రభుత్వానికి సూచించారు. ఈ వివాదానికి ముగింపు పలకాలని సూచించారు.