‘‘వైభవ్‌ సూర్యవంశీ ఆత్మవిశ్వాసం దెబ్బతీశారు’’.. టీమ్‌ మేనేజ్‌మెంట్‌పై ప్రపంచకప్‌ విజేత ఫైర్‌!

భారత యువ సంచలనం వైభవ్‌ సూర్యవంశీకి వరుస అవకాశాలు ఇవ్వకుండా టీమ్‌ మేనేజ్‌మెంట్‌ అతడి ఆత్మవిశ్వాసాన్ని దెబ్బతీసిందని 1983 ప్రపంచకప్‌ విజేత కృష్ణమాచారి శ్రీకాంత్‌ విమర్శించాడు. ఆటగాళ్లను పదే పదే మార్చడం సరికాదని అభిప్రాయపడ్డాడు. వెస్టిండీస్‌తో జరిగే మ్యాచ్‌లో అభిషేక్‌ శర్మకు విశ్రాంతినిచ్చి, వైభవ్‌ సూర్యవంశీ, సంజు శాంసన్‌లను ఓపెనర్లుగా ఆడించాలని సూచించాడు.

భారత టీ20 జట్టులో ఓపెనింగ్‌ స్థానాల కోసం అభిషేక్‌ శర్మ, సంజు శాంసన్‌, వైభవ్‌ సూర్యవంశీ మధ్య పోటీ నెలకొంది. అభిషేక్‌కు వరుసగా అవకాశాలు దక్కుతుండగా.. మిగతా ఆటగాళ్ల విషయంలో టీమ్‌ మేనేజ్‌మెంట్‌ మార్పులు చేస్తోంది. ఈ ధోరణి ఆటగాళ్ల ఆత్మవిశ్వాసంపై ప్రభావం చూపుతోందని శ్రీకాంత్‌ అభిప్రాయపడ్డాడు.

జూన్‌-జులైలో ఐర్లాండ్‌, ఇంగ్లాండ్‌ పర్యటనలకు వైభవ్‌ ఎంపికయ్యాడు. తొలుత సంజు శాంసన్‌కు అవకాశాలు దక్కాయి. అయితే, ఐర్లాండ్‌తో పాటు ఇంగ్లాండ్‌తో తొలి టీ20లోనూ అతడు ఆశించిన స్థాయిలో రాణించలేదు. ఆ తర్వాత రెండో టీ20లో వైభవ్‌ అంతర్జాతీయ అరంగేట్రం చేశాడు. ఆ సిరీస్‌లో మూడు మ్యాచ్‌లు ఆడి 14, 13, 15 పరుగులు సాధించాడు. అనంతరం జింబాబ్వే పర్యటనలో 50, 20, 81 పరుగులతో మెరిశాడు.

వైభవ్‌ ఆత్మవిశ్వాసాన్ని భారత జట్టు పూర్తిగా దెబ్బతీసిందని శ్రీకాంత్‌ వ్యాఖ్యానించాడు. వెస్టిండీస్‌ లాంటి జట్టుతో జరిగే మ్యాచ్‌లో అతడికి అవకాశం ఇవ్వాలని సూచించాడు. అభిషేక్‌ శర్మకు విశ్రాంతినిచ్చి, వైభవ్‌, సంజు శాంసన్‌లను ఓపెనర్లుగా ఆడించవచ్చని పేర్కొన్నాడు.

సంజు శాంసన్‌ ప్రదర్శనలో నిలకడ కొరవడుతోందని శ్రీకాంత్‌ అన్నాడు. 2026 టీ20 ప్రపంచకప్‌ విజయంలో కీలక ఇన్నింగ్స్‌లు ఆడిన అతడు, ఆ తర్వాత మళ్లీ ఫామ్‌ కోల్పోయాడని పేర్కొన్నాడు. అభిషేక్‌ శర్మ ఆటలో ఇలాంటి తీవ్ర హెచ్చుతగ్గులు కనిపించవని వ్యాఖ్యానించాడు.