145 కి.మీ రేంజ్‌తో హోండా క్యూసీ3 ఎలక్ట్రిక్ స్కూటర్.. ధర, ఫీచర్లు ఇవే!

ప్రముఖ వాహన తయారీ సంస్థ హోండా మోటార్‌సైకిల్ అండ్ స్కూటర్ ఇండియా (HMSI) భారత ఎలక్ట్రిక్ వాహన మార్కెట్లో తన స్థానాన్ని మరింత పటిష్ఠం చేసుకునే దిశగా మరో ముందడుగు వేసింది. తన పోర్ట్‌ఫోలియోను విస్తరిస్తూ, సరికొత్త 'హోండా క్యూసీ3' (QC3) ఎలక్ట్రిక్ స్కూటర్‌ను మార్కెట్లోకి విడుదల చేసింది. దీని ప్రారంభ ధరను రూ. 1.35 లక్షలుగా (ఎక్స్-షోరూం) నిర్ణయించింది. హోండా నుంచి వస్తున్న మూడో ఎలక్ట్రిక్ స్కూటర్ ఇది. గతంలో యాక్టివా ఇ, క్యూసీ1 మోడళ్లను సంస్థ విడుదల చేసిన విషయం తెలిసిందే.

ఈ స్కూటర్ ప్రధానంగా రోజువారీ పట్టణ ప్రయాణాలు చేసేవారిని, కుటుంబాలను లక్ష్యంగా చేసుకుని రూపొందించారు. సింగిల్ చార్జ్‌పై 145 కిలోమీటర్ల రేంజ్ (IDC సర్టిఫైడ్) అందిస్తుందని కంపెనీ ప్రకటించింది. ఇది హోండా యాక్టివా ఇ (102 కి.మీ) రేంజ్‌తో పోలిస్తే చాలా ఎక్కువ. ఇందులో 3.0 kWh బ్యాటరీ ప్యాక్‌ను అమర్చారు. కేవలం 2 గంటల 40 నిమిషాల్లో 0 నుంచి 80 శాతం వరకు చార్జ్ అవుతుందని, పూర్తిగా చార్జ్ కావడానికి సుమారు 4 గంటల సమయం పడుతుందని హోండా తెలిపింది.

హోండా క్యూసీ3 స్కూటర్‌లో అనేక ఆధునిక ఫీచర్లు ఉన్నాయి. హోండా రోడ్‌సింక్ యాప్ కనెక్టివిటీ, టర్న్-బై-టర్న్ నావిగేషన్ సదుపాయంతో కూడిన 5-అంగుళాల TFT డిస్‌ప్లే, స్మార్ట్ కీ వంటివి ప్రధాన ఆకర్షణగా నిలుస్తున్నాయి. సీటు కింద 32 లీటర్ల విశాలమైన స్టోరేజ్ స్పేస్ ఇవ్వడం మరో ప్రత్యేకత.

తొలి దశలో ఢిల్లీ, ఆగ్రా, కటక్, సూరత్, కొల్లం నగరాల్లో ఈ స్కూటర్ అందుబాటులో ఉంటుంది. దశలవారీగా దేశవ్యాప్తంగా విక్రయాలను విస్తరిస్తామని కంపెనీ పేర్కొంది. మ్యాట్ ఫాటాన్ గ్రే మెటాలిక్, పెరల్ ప్రిషియస్ వైట్, పెరల్ షలో బ్లూ, పెరల్ సైరన్ బ్లూ అనే నాలుగు ఆకర్షణీయమైన రంగుల్లో ఇది లభిస్తుంది. ఈ ఏడాది జులైలోనే ఈ స్కూటర్‌ను కంపెనీ ప్రదర్శనకు ఉంచింది.