నల్ల సముద్రం తీరంలో.. వెలుగులోకి 12,900 ఏళ్ల నాటి వేటగాళ్ల ప్రపంచం

తుర్కియేలో పురావస్తు శాస్త్రవేత్తలు ఓ కీలకమైన ఆవిష్కరణ చేశారు. తూర్పు నల్ల సముద్రం ప్రాంతంలోని ట్రాబ్జోన్ సమీపంలో ఉన్న కోస్కర్లీ గుహలో ఏకంగా 12,900 ఏళ్ల క్రితం నాటి మానవ ఆనవాళ్లను కనుగొన్నారు. ప్రాచీన కాలంలో ఈ ప్రాంతంలో నివసించిన వేటగాళ్ల జీవనశైలికి సంబంధించిన స్పష్టమైన ఆధారాలు ఇక్కడ లభించాయి. ఈ పరిశోధన వివరాలను ప్రఖ్యాత 'యాంటిక్విటీ' జర్నల్‌లో ప్రచురిత‌మ‌య్యాయి.

ట్రాబ్జోన్‌కు దక్షిణంగా సుమారు 40 కిలోమీటర్ల దూరంలో, సముద్ర మట్టానికి 1,030 మీటర్ల ఎత్తులో ఈ కోస్కర్లీ గుహ ఉంది. దీనిని 2019లో గుర్తించగా, 2024 నుంచి శాస్త్రీయమైన తవ్వకాలు ప్రారంభించారు. పై పొరల కింద చెక్కుచెదరకుండా ఉన్న 20 నుంచి 40 సెంటీమీటర్ల మందపాటి పొరలో ఈ ఆధారాలు బయటపడ్డాయి. ఈ పొరలో బూడిద, కాల్చిన కర్ర ముక్కలు, వేడికి రూపాంతరం చెందిన రాతి అవశేషాలు ఉన్నాయి. కార్బన్ డేటింగ్ ద్వారా ఇక్కడి బొగ్గు, ఎముకల వయసును 12,900 నుంచి 12,000 ఏళ్ల మధ్య కాలానికి చెందినదిగా శాస్త్రవేత్తలు నిర్ధారించారు.

తవ్వకాల్లో అనేక రకాల రాతి పనిముట్లు లభించాయి. రంగురంగుల చెకుముకి రాళ్లు, అబ్సిడియన్, డాసిటిక్ శిలలతో తయారు చేసిన ఉపకరణాలు ఇందులో ఉన్నాయి. ముఖ్యంగా ఎండ్‌-స్క్రాపర్లు, బ్లేడ్లు, పాయింట్లు, రంధ్రాలు చేసే పరికరాలు (పెర్ఫొరేటర్లు), బురిన్‌లు, అర్ధచంద్రాకారంలో ఉండే లూనేట్‌లు వంటివి స్వాధీనం చేసుకున్నారు. ఇక్కడే పనిముట్లను తయారు చేశారని చెప్పడానికి నిదర్శనంగా రాతి కోర్లు, వాటిని చెక్కగా వచ్చిన ముక్కలు కూడా దొరికాయి. పనిముట్లతో పాటు వారి వ్యక్తిగత అలంకరణ వస్తువులు కూడా దొరకడం విశేషం. గాట్లు పెట్టిన జింక కొమ్ము ముక్క, రంధ్రం చేసిన జంతువు పంటిని ఆభరణాలుగా ఉపయోగించి ఉంటారని పరిశోధకులు భావిస్తున్నారు.

ఈ ప్రాంతంలో ప్లీస్టోసీన్ యుగాంతం (ఎపిపాలియోలిథిక్ కాలం) నాటి వేటగాళ్ల గురించి ఇంత స్పష్టమైన పురావస్తు ఆధారాలు లభించడం ఇదే మొదటిసారని శాస్త్రవేత్తలు చెబుతున్నారు. ఇక్కడి పనిముట్లకు, పొరుగున ఉన్న అనటోలియా, లెవాంట్, కాకసస్ ప్రాంతాలలోని పురావస్తు పరిశ్రమలకు మధ్య సారూప్యతలు ఉండటంతో ఆ కాలంలో ఈ ప్రాంతాల మధ్య సంబంధాలు ఉండవచ్చని అంచనా వేస్తున్నారు. ఈ ఆవిష్కరణ.. ఇప్పటివరకు పెద్దగా అధ్యయనం జరగని ఈ ప్రాంతంలో ప్రాచీన మానవుల చరిత్రను అర్థం చేసుకోవడానికి ఒక ముఖ్యమైన రిఫరెన్స్ పాయింట్‌గా నిలుస్తుందని పరిశోధకులు అభిప్రాయపడుతున్నారు.