ఫిఫా వరల్డ్ కప్ ఫైనల్... ఢిల్లీలో తెల్లవారుజాము 4 గంటల వరకు రెస్టారెంట్లు ఓపెన్

ఫిఫా వరల్డ్ కప్ 2026 ఫైనల్ మ్యాచ్ సందర్భంగా ఢిల్లీ ప్రభుత్వం ఫుట్‌బాల్ అభిమానులకు శుభవార్త చెప్పింది. ఈ వారాంతంలో జరిగే ఫైనల్ మ్యాచ్‌ను పురస్కరించుకుని, నగరంలోని రెస్టారెంట్లు, కేఫ్‌లు తెల్లవారుజామున 4 గంటల వరకు తెరిచి ఉంచేందుకు అనుమతిస్తున్నట్లు ముఖ్యమంత్రి రేఖా గుప్తా శనివారం ప్రకటించారు. ఫుట్‌బాల్ అభిమానులు, ముఖ్యంగా లియోనెల్ మెస్సీ ఫ్యాన్స్ ఈ చారిత్రక రాత్రిని ఆస్వాదించాలని ఆమె ఆహ్వానించారు.

ఈ సందర్భంగా సీఎం రేఖా గుప్తా సోషల్ మీడియాలో స్పందిస్తూ.. "లియోనెల్ మెస్సీ చరిత్ర సృష్టించడాన్ని ప్రతి ఒక్కరూ చూశారు. ఇప్పుడు ఆ చరిత్రలో మరో అధ్యాయం లిఖించబోతోంది. ఒక లెజెండ్, ఒక ట్రోఫీ, తరతరాలు గుర్తుంచుకునే ఒక రాత్రి. ఆ రాత్రి కోసం ఢిల్లీ సిద్ధంగా ఉంది" అని పేర్కొన్నారు. తమ ప్రభుత్వం ప్రవేశపెట్టిన 24x7 వ్యాపార అనుకూల విధానం వల్లే ఇది సాధ్యమైందని ఆమె వివరించారు.

గత ఏడాది ఫిబ్రవరిలో అధికారంలోకి వచ్చిన తమ ప్రభుత్వం, వ్యాపారాలను సులభతరం చేసేందుకు (ఈజ్ ఆఫ్ డూయింగ్ బిజినెస్) అనేక సంస్కరణలు చేపట్టిందని సీఎం గుర్తుచేశారు. బడ్జెట్‌ను రూ.75,000 కోట్ల నుంచి రూ.1 లక్ష కోట్లకు పెంచడంతో పాటు సింగిల్ విండో సిస్టమ్, 75 ఈ-డిస్ట్రిక్ట్ సేవలు, లాజిస్టిక్స్ పాలసీ వంటివి అమలు చేస్తున్నట్లు తెలిపారు.

వ్యాపార సౌలభ్యం కోసం చిన్న చిన్న ఉల్లంఘనలను నేరాల జాబితా నుంచి తొలగించే 'ఢిల్లీ జన్ విశ్వాస్ (సవరణ) బిల్లు, 2026'ను కూడా తమ కేబినెట్ ఆమోదించిందని రేఖా గుప్తా వెల్లడించారు. ఈ బిల్లు ద్వారా చిన్న పొరపాట్లకు క్రిమినల్ చర్యల స్థానంలో జరిమానాలు విధిస్తామని, తద్వారా కోర్టులపై భారం తగ్గుతుందని ఆమె స్పష్టం చేశారు.