భారత రియల్ ఎస్టేట్ రంగంలో ఒక కొత్త ధోరణి వేగంగా విస్తరిస్తోంది. కేవలం ఆతిథ్య వ్యాపారంగా కాకుండా, ఎకో-రిసార్టులు ఇప్పుడు ఒక ప్రత్యేక పెట్టుబడి విభాగంగా గుర్తింపు పొందుతున్నాయి. వెల్ నెస్ టూరిజంపై ఆసక్తి పెరగడం, నిరంతర ఆదాయంతో పాటు భూమి విలువ కూడా వృద్ధి చెందడం వంటివి పెట్టుబడిదారులను, డెవలపర్లను ఈవైపు ఆకర్షిస్తున్నాయి.

గతంలో సీజనల్ వ్యాపారాలుగా పరిగణించిన ఈ రిసార్టులు, ఇప్పుడు వృత్తిపరమైన నిర్వహణతో స్థిరమైన ఆదాయాన్ని అందిస్తున్నాయి. సంప్రదాయ విలాసాల కన్నా ఆరోగ్యం, మానసిక ప్రశాంతత, ప్రకృతికి దగ్గరగా గడిపే అనుభవాలకు నేటి తరం వినియోగదారులు ప్రాధాన్యం ఇస్తున్నారు. యోగా, ఆయుర్వేదం వంటి అంశాలలో భారత్‌కు ఉన్న ప్రత్యేకత ఈ రంగానికి మరింత ఊతమిస్తోంది. 2025 నాటికి ప్రపంచ వెల్ నెస్ టూరిజం మార్కెట్ సుమారు 990 బిలియన్ డాలర్లకు చేరుతుందని అంచనా.

ఈ డిమాండ్‌కు అనుగుణంగా ఎకో-రిసార్టులు వెల్ నెస్ రిట్రీట్లు, ఆర్గానిక్ ఫుడ్, ఫారెస్ట్ యాక్టివిటీస్, డిజిటల్ డిటాక్స్ వంటి ప్రత్యేక సేవలను అందిస్తున్నాయి. సౌరశక్తి, వర్షపు నీటి సంరక్షణ వంటి సుస్థిర పద్ధతుల వల్ల నిర్వహణ ఖర్చులు కూడా తగ్గుతాయి. తాజాగా 'ది హిందూ' పత్రిక తన కథనంలో పేర్కొన్న ప్రకారం, పర్యాటక ప్రాంతాల్లో మౌలిక సదుపాయాలు మెరుగుపడుతున్న కొద్దీ ఎకో-రిసార్టులు స్థిరమైన ఆదాయం, మూలధన వృద్ధిని అందించే ఆస్తులుగా మారుతున్నాయి.

ఇటీవల బెంగళూరు సమీపంలో హిమాలియా ప్రైమ్ అసెట్స్ ఒక ఎకో-రిసార్టును కొనుగోలు చేయడం, ఈ రంగంపై సంస్థాగత పెట్టుబడిదారులకు పెరుగుతున్న ఆసక్తికి నిదర్శనం. నిపుణుల అంచనా ప్రకారం, నిరంతర ఆదాయం, పర్యావరణ అనుకూల లక్ష్యాలు వంటి అంశాలు ఎకో-రిసార్టులను ఆకర్షణీయమైన పెట్టుబడి మార్గంగా నిలుపుతున్నాయి. భవిష్యత్తులో భారత రియల్ ఎస్టేట్ రంగంలో ఇవి కీలక పాత్ర పోషించే అవకాశం ఉంది.