సికింద్రాబాద్లో ఈ రోడ్లకు పేర్లు మారాయి తెలుసా?
- సికింద్రాబాద్ కంటోన్మెంట్లో 21 రోడ్ల పేర్ల మార్పు
- బ్రిటిష్ కాలం నాటి పేర్ల స్థానంలో జాతీయ హీరోల పేర్లు
- గల్వాన్ వీరుడు సంతోష్ బాబు పేరుతో ఓ మార్గం
- నెల రోజుల్లో కొత్త సైన్ బోర్డులు ఏర్పాటు చేయనున్న అధికారులు
- కేంద్ర రక్షణ శాఖ ఆదేశాల మేరకు ఈ మార్పులు
జూన్ 17న బోర్డు ప్రెసిడెంట్, బ్రిగేడియర్ ఎస్. రాజీవ్ అధ్యక్షతన జరిగిన సమావేశంలో ఈ ప్రతిపాదనకు ఆమోదముద్ర వేశారు. పాత పేర్లను తొలగించి, కొత్త సైన్ బోర్డులను ఏర్పాటు చేసే ప్రక్రియను నెల రోజుల్లో పూర్తి చేస్తామని ఎస్సీబీ చీఫ్ ఎగ్జిక్యూటివ్ ఆఫీసర్ అరవింద్ కుమార్ ద్వివేది తెలిపారు. ఈ మార్పు దేశ సైనిక వారసత్వాన్ని, జాతీయ ప్రతీకలను గౌరవించుకునే విస్తృత ప్రయత్నంలో భాగమని ఆయన పేర్కొన్నారు.
తాజా మార్పుల ప్రకారం, లిట్టన్ రోడ్డుకు నేతాజీ సుభాష్ చంద్రబోస్ రోడ్డు అని, బోల్టన్ రోడ్డుకు అటల్ బిహారీ వాజ్పేయి మార్గ్ అని, నోబెల్ రోడ్డుకు ఏపీజే అబ్దుల్ కలాం మార్గ్ అని నామకరణం చేశారు. 2020 గల్వాన్ లోయ ఘర్షణలో వీరమరణం పొందిన కల్నల్ బి. సంతోష్ బాబును స్మరించుకుంటూ బర్టన్ రోడ్డుకు 'సంతోష్ బాబు మార్గ్' అని పేరు పెట్టారు.
అదేవిధంగా, దేశ రక్షణ కోసం ప్రాణాలర్పించిన పలువురు అమరవీరులకు ఈ సందర్భంగా ఘన నివాళి అర్పించారు. పరమవీరచక్ర, ఇతర శౌర్య పురస్కార గ్రహీతలైన కెప్టెన్ విక్రమ్ బాత్రా (వెల్లింగ్టన్ రోడ్డు), మేజర్ సందీప్ ఉన్నికృష్ణన్ (రిచర్డ్సన్ రోడ్డు), లెఫ్టినెంట్ కల్నల్ ఏబీ తారాపూర్ (ప్రోట్నీ రోడ్డు), కంపెనీ క్వార్టర్మాస్టర్ హవల్దార్ అబ్దుల్ హమీద్ (అమ్హెర్స్ట్ రోడ్డు) వంటి యోధుల పేర్లను పలు రోడ్లకు పెట్టారు.
బోర్డు ఆమోదించిన పూర్తి జాబితా ఇదే:
ప్రోట్నీ రోడ్డు → తారాపూర్ మార్గ్
స్టీవార్ట్ రోడ్డు → లాన్స్ నాయక్ రామ్ చందర్ మార్గ్
రిచర్డ్సన్ రోడ్డు → ఉన్నికృష్ణన్ మార్గ్
బార్ రోడ్డు → కౌకూర్ ఆర్మీ రోడ్డు
రైట్ రోడ్డు → విజయ్ మార్గ్
హిస్లాప్ రోడ్డు → కర్తవ్య మార్గ్
అమ్హెర్స్ట్ రోడ్డు → అబ్దుల్ హమీద్ మార్గ్
బయామ్ రోడ్డు → పరమహంస మార్గ్
కార్న్వాలిస్ రోడ్డు → స్వామి వివేకానంద మార్గ్
రాబర్ట్స్ రోడ్డు → గురుబచన్ సింగ్ సలారియా మార్గ్
ఎంప్రెస్ రోడ్డు → వీర్ నారీ మార్గ్
అల్బేన్ రోడ్డు → ధన్ సింగ్ థాపా మార్గ్
మార్నింగ్టన్ రోడ్డు → జదునాథ్ సింగ్ మార్గ్
వెల్లింగ్టన్ రోడ్డు → విక్రమ్ బాత్రా మార్గ్
గఫ్ రోడ్డు → సోమనాథ్ శర్మ మార్గ్
బోల్టన్ రోడ్డు → అటల్ బిహారీ వాజ్పేయి రోడ్డు
నోబెల్ రోడ్డు → ఏపీజే అబ్దుల్ కలాం రోడ్డు
నికెల్సన్ రోడ్డు → అరుణ్ ఖేతర్పాల్ రోడ్డు
లిట్టన్ రోడ్డు → నేతాజీ సుభాష్ చంద్రబోస్ రోడ్డు
బర్టన్ రోడ్డు → సంతోష్ బాబు రోడ్డు
హేర్ రోడ్డు → తాడ్బండ్ టెంపుల్ రోడ్డు
రోడ్లతో పాటు బేరర్స్ లైన్స్ పేరును కర్తవ్య నగర్గా, 108 బజార్ను ఇన్ఫాంట్రీ బజార్గా, ఆర్ఏ పెన్షనర్స్ లైన్స్ను ఆర్టిలరీ పెన్షనర్స్ లైన్స్గా మార్చారు. దేశవ్యాప్తంగా కంటోన్మెంట్ బోర్డులలో వలసవాద పేర్లను తొలగించాలని 2021లో కేంద్ర రక్షణ మంత్రిత్వ శాఖ జారీ చేసిన ఆదేశాల మేరకు ఈ మార్పులు చేపట్టారు. ఈ ఏడాది ప్రారంభంలోనే భారత సైన్యం దేశవ్యాప్తంగా 246 రోడ్లు, భవనాలు, ఇతర సౌకర్యాల పేర్లను మార్చిన విషయం తెలిసిందే.
