మంచి జీతాలు వస్తున్నప్పటికీ, పెరుగుతున్న ఖర్చులు, మెరుగైన జీవనశైలి కోసం చాలామంది అదనపు ఆదాయ మార్గాలను అన్వేషిస్తున్నారు. ఈ క్రమంలో 'సైడ్ హస్టల్' ద్వారా కొంత డబ్బు సంపాదించాలని ఆలోచిస్తుంటారు. అయితే, ఈ ప్రయత్నం నిజంగా లాభదాయకమేనా? దీనివల్ల కలిగే ప్రయోజనాలు, ఎదురయ్యే సవాళ్లపై ఒక ఆసక్తికరమైన సంభాషణ చోటుచేసుకుంది. ఏటా రూ. 22 లక్షలు సంపాదిస్తున్న ఓ జంట, నెలకు అదనంగా రూ. 20,000 కోసం ఇతర పనులు చేయవచ్చా అని చాట్‌జీపీటీని అడగ్గా, అది ఊహించని రీతిలో ప్రాక్టికల్ సలహాలు ఇచ్చింది.

వివరాల్లోకి వెళితే, ఒక జంటలో భర్త జీతం రూ. 12 లక్షలు, భార్య జీతం రూ. 10 లక్షలు. వారికి పెద్దగా అప్పులు లేనప్పటికీ, పెరుగుతున్న ఖర్చుల దృష్ట్యా అదనపు ఆదాయం కోసం ప్రయత్నించాలనుకున్నారు. రోజుకు 2-3 గంటల సమయం కేటాయించగలమని, అయితే హాబీలను వ్యాపారంగా మార్చడం, యూట్యూబ్, ఇన్‌ఫ్లుయెన్సర్ వంటి వాటిపై ఆసక్తి లేదని స్పష్టం చేశారు. వాస్తవికమైన, మార్కెట్‌లో నిరూపితమైన మార్గాలను సూచించమని కోరారు.

దీనికి చాట్‌జీపీటీ ఇచ్చిన సలహా చాలామందిని ఆలోచింపజేస్తోంది. "కొత్తగా సంపాదించడం కంటే ముందు, మీ ప్రస్తుత ఆర్థిక పరిస్థితిని సమీక్షించుకోండి. నెలవారీ ఖర్చుల్లో రూ. 20,000 తగ్గించుకోగలిగితే, అది కొత్తగా సంపాదించడంతో సమానం. పైగా, దీనికి పన్నులు ఉండవు, అదనపు సమయం కేటాయించాల్సిన అవసరం లేదు" అని సూచించింది.

ఒకవేళ ఇతర పనులు చేయాలని నిశ్చయించుకుంటే, రోజులో ఎన్ని గంటలు పనిచేయగలరు?.. ఎంత ఆదాయం వస్తుంది?.. ఆ ప్రకారం గంటకు ఎంత సంపాదించగలరో లెక్కించుకోవాలని చెప్పింది. ఉద్యోగ నైపుణ్యాలతో చేసే కన్సల్టింగ్, ఫ్రీలాన్సింగ్ వంటివి ఉత్తమ మార్గాలని, అదే సమయంలో అధిక సమయం తీసుకునే ఈ-కామర్స్, డ్రాప్‌షిప్పింగ్ వంటి వాటికి దూరంగా ఉండటం మంచిదని సలహా ఇచ్చింది.

అంతేకాకుండా, "90 రోజుల ప్రయోగం" పేరుతో ఒక యాక్షన్ ప్లాన్‌ను కూడా సూచించింది.
మొదటి నెల: ఒకే ఒక వ్యాపార ఆలోచనను ఎంచుకోవాలి.
రెండో నెల: డబ్బులిచ్చి సేవలు పొందే మొదటి కస్టమర్‌ను సంపాదించాలి.
మూడో నెల: కనీసం రూ. 5,000 ఆదాయం సంపాదించి, ఆలోచన ఆచరణ సాధ్యమేనా అని నిర్ధారించుకోవాలి.

ఆదాయం రావడం మొదలయ్యే వరకు వెబ్‌సైట్, బ్రాండింగ్ వంటి వాటిపై సమయం, డబ్బు వృథా చేయవద్దని చాట్‌జీపీటీ నొక్కి చెప్పింది. ఆరు నెలల తర్వాత కూడా ఆదాయం రాకపోయినా, ఈ ప్రయత్నం వల్ల వైవాహిక జీవితంలో ఒత్తిడి పెరిగినా, నిద్ర కరవైనా వెంటనే ఆపేయడం మేలని హితవు పలికింది.