రియల్ లైఫ్ 'ఐరన్ మ్యాన్'... ఈ కథేంటో చూడండి!

హాలీవుడ్ సినిమా 'ఐరన్ మ్యాన్' చూసి టోనీ స్టార్క్‌లా మారిపోవాలని చాలా మంది కలలు కంటారు. కానీ, రష్యాకు చెందిన అలెక్స్ బర్కన్ అనే ఇంజనీర్ ఆ కలను నిజం చేసుకునే పనిలో పడ్డాడు. తన గ్యారేజ్‌నే ప్రయోగశాలగా మార్చుకుని, దాదాపు 2018 నుంచి నిజంగా పనిచేసే ఐరన్ మ్యాన్ తరహా ఎక్సోసూట్‌ను నిర్మిస్తున్నాడు. 

ఐరన్ మ్యాన్ సినిమా మొదటి పార్ట్ లో టోనీ స్టార్క్ ఒక గుహలో అందుబాటులో ఉన్న వస్తువులతో సూట్ తయారు చేసినట్టుగానే, అలెక్స్ కూడా తన గ్యారేజ్‌లో 3D ప్రింటింగ్, పాత సామాన్లు, తన ఇంజనీరింగ్ నైపుణ్యంతో ఈ అద్భుతాన్ని ఆవిష్కరిస్తున్నాడు. ఈ ప్రాజెక్ట్ వివరాలను 'ALEX LAB' అనే తన యూట్యూబ్ ఛానల్‌లో పంచుకుంటూ, ప్రపంచవ్యాప్తంగా "నిజ జీవిత టోనీ స్టార్క్"గా ప్రశంసలు అందుకుంటున్నాడు.

సూట్ ప్రత్యేకత.. హైడ్రోజన్ రియాక్టర్

ఈ సూట్‌లో అందరినీ ఎక్కువగా ఆకర్షిస్తున్నది దాని ఛాతీ భాగంలో అమర్చిన 'హైడ్రోజన్ రియాక్టర్'. అయితే ఇది సినిమాలో చూపించినట్టు అణుశక్తితో పనిచేసే ఆర్క్ రియాక్టర్ కాదు. ఇదొక ఎలక్ట్రోలైజర్. ఇది బ్యాటరీల నుంచి విద్యుత్‌ను తీసుకుని, నీటిని హైడ్రోజన్, ఆక్సిజన్ వాయువులుగా (HHO గ్యాస్) విడగొడుతుంది. ఈ వాయువును ఇంధనంగా ఉపయోగించి సూట్‌కు అమర్చిన కొన్ని పరికరాలను పనిచేయిస్తున్నాడు. 

ఇందుకోసం టెస్లా కార్ల పాత బ్యాటరీ ప్యాక్‌ల నుంచి తీసిన 18650 లిథియం-అయాన్ సెల్స్‌ను కూడా వాడుతుండటం విశేషం. సూట్ కవచం కోసం 3D ప్రింటెడ్, కాంపోజిట్ భాగాలను, కదలికల కోసం హైడ్రోజన్ లేదా కంప్రెస్డ్ గ్యాస్‌తో పనిచేసే ఆర్టిఫిషియల్ కండరాలను అమర్చాడు.

హైప్ వర్సెస్ రియాలిటీ

అలెక్స్ నిర్మించిన ఈ సూట్ ఎగరలేదు, అమాంతం బరువులు ఎత్తేయలేదు. కానీ, దీనికి అమర్చిన రిపల్సర్ పరికరం నుంచి నిజంగానే మంటలు, థ్రస్ట్ (పీడనం) ఉత్పత్తి అవుతాయి. అతను చేసిన పరీక్షల వీడియోలలో, రిపల్సర్ ఆన్ చేసినప్పుడు అది వెనక్కి నెట్టడం (రీకాయిల్) స్పష్టంగా కనిపిస్తుంది. ఒక వ్యక్తి తన గ్యారేజ్‌లో సొంతంగా ఇంత క్లిష్టమైన ఎక్సోసూట్ ఫ్రేమ్‌ను, గ్యాస్ జనరేటర్‌ను తయారుచేయడం ఇంజనీరింగ్ పరంగా గొప్ప విషయమని నిపుణులు అంటున్నారు. 

అయితే, మీడియాలో వస్తున్న "రియల్ ఐరన్ మ్యాన్" అనే ప్రచారానికి, వాస్తవానికి కాస్త తేడా ఉంది. ఇది విప్లవాత్మక టెక్నాలజీ కాకపోయినా, పట్టుదలతో సాధించాలనే తపన ఉన్నవారికి గొప్ప స్ఫూర్తి. తన ప్రయోగాల పురోగతిని, ఎదురైన సవాళ్లను అలెక్స్ బహిరంగంగా యూట్యూబ్‌లో పంచుకోవడంతో, ప్రపంచవ్యాప్తంగా ఉన్న మేకర్ కమ్యూనిటీకి ఇతను ఆదర్శంగా నిలుస్తున్నాడు.

గిన్నిస్ రికార్డ్

అలెక్స్ బర్కన్ గతంలో ప్రపంచంలోనే మొట్టమొదటి రిట్రాక్టబుల్ లైట్‌సేబర్‌ను తయారుచేసి అందరినీ ఆశ్చర్యపరిచాడు. ఈ ఆవిష్కరణకు గాను అతడు గిన్నిస్ వరల్డ్ రికార్డ్స్‌లో స్థానం సంపాదించాడు. 'అలెక్స్ ల్యాబ్' అనే యూట్యూబ్ ఛానెల్ నిర్వాహకుడైన బర్కన్, ఈ లైట్‌సేబర్‌తో స్టీల్‌ను సైతం సులభంగా కట్ చేసి చూపించాడు.

గిన్నిస్ వరల్డ్ రికార్డ్స్ ప్రకారం, ఈ లైట్‌సేబర్ ఒక మీటర్ పొడవైన ప్లాస్మా బ్లేడ్‌ను ఉత్పత్తి చేస్తుంది. దీని ఉష్ణోగ్రత 2,800 డిగ్రీల సెల్సియస్ కంటే ఎక్కువగా ఉంటుంది. నీటిని హైడ్రోజన్, ఆక్సిజన్‌గా విడగొట్టే ఎలక్ట్రోలైజర్ అనే పరికరం సాయంతో ఇది పనిచేస్తుంది. ఈ వాయువులను మండించడం ద్వారా శక్తివంతమైన ప్లాస్మా కిరణం వెలువడుతుంది.