ప్రస్తుత ఐపీఎల్ సీజన్‌లో బౌలర్ల పరిస్థితి చూస్తుంటే జాలేస్తోందని టాలీవుడ్ యువ హీరో, క్రికెట్ అభిమాని ఆది సాయికుమార్ అన్నారు. ఇటీవల జరిగిన రెండు మ్యాచ్‌లలో భారీ స్కోర్లు నమోదైన నేపథ్యంలో, ఆయన సోషల్ మీడియా ప్లాట్‌ఫామ్ 'ఎక్స్' వేదికగా బౌలర్ల కష్టాలపై స్పందించారు.

"ఈ ఐపీఎల్‌లో బౌలర్ల పరిస్థితిపై సానుభూతి కలుగుతోంది. ఫ్లాట్ వికెట్లపై పేస్ గానీ, స్పిన్ గానీ ఏమాత్రం సహకరించడం లేదు. ఒక నో-బాల్, ఒక ఫ్రీ హిట్ వారి అవకాశాలను దెబ్బతీస్తున్నాయి. ఈ ఫార్మాట్‌లో బౌలర్‌గా ఉండాలని ఎవరు కోరుకుంటారు? చిన్న బౌండరీలు కూడా బౌలర్లపై ప్రభావం చూపుతున్నాయి" అని ఆది తన పోస్టులో పేర్కొన్నారు. బ్యాట్, బాల్ మధ్య సమతూకం ఉన్నప్పుడే ఆట ఆసక్తికరంగా ఉంటుందని, అధిక స్కోర్లు మంచివే అయినా 170 పరుగుల మధ్యస్థ స్కోరుతో జరిగే మ్యాచ్‌లను తాను మిస్ అవుతున్నానని అభిప్రాయపడ్డారు.

ఇక సినిమాల విషయానికొస్తే, 'శంబాల'తో తన కెరీర్‌లో అతిపెద్ద విజయాన్ని అందుకున్న ఆది సాయికుమార్, ఇప్పుడు కాన్సెప్ట్ ఆధారిత చిత్రాలపై దృష్టి సారించారు. ఆయన తదుపరి చిత్రం 'సైరాబాను'ను ఇటీవలే ప్రకటించారు. ఫణి కృష్ణ సిరికి దర్శకత్వం వహిస్తున్న ఈ చిత్రాన్ని, 'కె-ర్యాంప్' ఘన విజయంతో జోరు మీదున్న నిర్మాత రాజేష్ దండా హస్య మూవీస్ బ్యానర్‌పై నిర్మిస్తున్నారు. ఈ సినిమాలో ఆది సరసన బాంధవి శ్రీధర్ హీరోయిన్‌గా నటించనుంది. రాజమండ్రి, హైదరాబాద్ నేపథ్యంలో సాగే ఈ హిందూ-ముస్లిం ప్రేమకథ షూటింగ్ త్వరలోనే ప్రారంభం కానుంది.