నగర శివార్లలో నకిలీ కరెన్సీ ముద్రించి, చలామణీ చేయడంతో పాటు దోపిడీలకు పాల్పడుతున్న ఓ భారీ ముఠా గుట్టును పోలీసులు రట్టు చేశారు. ఈ ఆపరేషన్‌లో నలుగురు నిందితులను అరెస్ట్ చేసి, వారి వద్ద నుంచి ఏకంగా రూ.6.78 కోట్ల విలువైన నకిలీ రూ.500 నోట్లను స్వాధీనం చేసుకున్నారు. ప్రింటర్లు, ల్యాప్‌టాప్‌, ఇతర సామగ్రిని కూడా సీజ్ చేసినట్లు ఫ్యూచర్ సిటీ పోలీస్ కమిషనర్ తరుణ్ జోషి వెల్లడించారు.

వివరాల్లోకి వెళితే, నవంబర్ 1వ తేదీన జాతీయ రహదారి-65పై రామోజీ ఫిల్మ్ సిటీ సమీపంలో ఒక కారులో నకిలీ నోట్లను విజయవాడకు తరలిస్తున్నట్లు పోలీసులకు పక్కా సమాచారం అందింది. దీంతో అబ్దుల్లాపూర్‌మెట్ పోలీసులు, షాద్‌నగర్ స్పెషల్ ఆపరేషన్స్ టీమ్ (SOT) సంయుక్తంగా వాహనాన్ని అడ్డగించి తనిఖీ చేశారు. కారులో ఉన్న ఎం. కరుణాకర్, సిహెచ్. మాణిక్య రెడ్డి, సిహెచ్. రత్నాకర్ రెడ్డి, కె. అజయ్ కుమార్‌లను అరెస్ట్ చేసి, వారి వద్ద నుంచి రూ.8 లక్షల నకిలీ కరెన్సీని స్వాధీనం చేసుకున్నారు.

నిందితులను విచారించగా, కుంట్లూర్‌లోని ఓ అద్దె ఇంట్లో నకిలీ కరెన్సీ ప్రింటింగ్ యూనిట్‌ను నడుపుతున్నట్లు అంగీకరించారు. దీంతో పోలీసులు వెంటనే ఆ ఇంటిపై దాడి చేసి, భారీ మొత్తంలో నకిలీ నోట్ల కట్టలు, ప్రింటర్లు, ల్యాప్‌టాప్, కరెన్సీ కటింగ్ మెషీన్‌లను సీజ్ చేశారు.

నిందితుల మోసం ఇలా..
ఈ ముఠా కేవలం నకిలీ నోట్లను ముద్రించడమే కాకుండా, వినూత్న పద్ధతిలో దోపిడీలకు పాల్పడేదని పోలీసులు తెలిపారు. తక్కువ ధరకు నకిలీ కరెన్సీ ఇస్తామని, అసలు డబ్బు ఇస్తే మూడు, నాలుగు రెట్లు నకిలీ నోట్లు ఇస్తామని ఆశ చూపి కస్టమర్లను ఆకర్షించేవారు. వారు అసలు డబ్బుతో వచ్చినప్పుడు, ముఠాలోని ఇతర సభ్యులు నకిలీ పోలీస్ ఐడీ కార్డులు, వాకీ-టాకీలు, డమ్మీ పిస్టల్‌తో పోలీసుల వేషంలో అక్కడికి వచ్చేవారు. నకిలీ నోట్ల దందా చేస్తున్నారంటూ కస్టమర్లను బెదిరించి, చట్టపరమైన చర్యలు తీసుకుంటామని హెచ్చరించేవారు. దీంతో భయపడిన బాధితులు తమ వెంట తెచ్చుకున్న అసలు డబ్బును అక్కడే వదిలి పారిపోయేవారు. ఈ విధంగా ఇద్దరు కస్టమర్ల నుంచి రూ.2 లక్షలు, రూ.3 లక్షలు దోచుకున్నట్లు విచారణలో తేలింది.

ప్రధాన నిందితుడు కరుణాకర్, యూట్యూబ్ వీడియోలు చూసి అసలు రూ.500 నోటును స్కాన్ చేసి, ఫోటోషాప్‌లో ఎడిట్ చేసి నకిలీ నోట్లను ఎలా ప్రింట్ చేయాలో నేర్చుకున్నట్లు పోలీసులు గుర్తించారు. అరెస్ట్ చేసిన నలుగురు నిందితులను కోర్టులో హాజరుపరచగా, వారికి జ్యుడీషియల్ కస్టడీ విధించారు. ఈ కేసులో పరారీలో ఉన్న జెల్లి వెంకటేష్, కుంజ బాలరాజు, కంపసాటి శ్రీనివాస్ అనే మరో ముగ్గురు నిందితుల కోసం గాలింపు చర్యలు ముమ్మరం చేశారు. ఈ రాకెట్ వెనుక ఇంకా ఎవరైనా ఉన్నారా అనే కోణంలో దర్యాప్తు కొనసాగిస్తున్నారు.