బాలీవుడ్ బాద్‌షా షారుఖ్ ఖాన్ నటిస్తున్న కొత్త చిత్రం 'కింగ్' విడుదలకు ముందే బాక్సాఫీస్ వద్ద సంచలనాలు సృష్టిస్తోంది. సిద్ధార్థ్ ఆనంద్ దర్శకత్వంలో రాబోతున్న ఈ సినిమా, ప్రీ-రిలీజ్ డీల్స్ ద్వారా ఏకంగా రూ. 665 కోట్లు ఆర్జించినట్లు ట్రేడ్ వర్గాల సమాచారం. థియేట్రికల్, నాన్-థియేట్రికల్ హక్కుల రూపంలో ఈ భారీ మొత్తం సమకూరిన‌ట్లు తెలుస్తోంది.

వివరాల్లోకి వెళితే.. ఈ సినిమా ఓవర్సీస్ పంపిణీ హక్కులను ఫార్స్ ఫిల్మ్స్ సంస్థ కనీస గ్యారెంటీ కింద రూ. 175 కోట్లకు కొనుగోలు చేసినట్లు సమాచారం. భారతీయ సినిమా చరిత్రలో ఓవర్సీస్ మార్కెట్‌లో ఇదే అతిపెద్ద డీల్ కావడం విశేషం. ఇక, దేశీయ థియేట్రికల్ హక్కులను పెన్ మరుధర్ సంస్థ రూ. 250 కోట్లకు దక్కించుకున్నట్లు తెలుస్తోంది. వీటితో పాటు ప్రముఖ ఓటీటీ ప్లాట్‌ఫామ్ నెట్‌ఫ్లిక్స్ స్ట్రీమింగ్ హక్కుల కోసం రూ. 150 కోట్లు చెల్లించింది. అయితే, సినిమా థియేట్రికల్ ప్రదర్శన ఆధారంగా ఈ మొత్తం మారే అవకాశం ఉందని ఒప్పందంలో ఒక నిబంధన ఉన్నట్లు సమాచారం. శాటిలైట్ హక్కులు రూ. 25 కోట్లకు, మ్యూజిక్ హక్కులు రూ. 65 కోట్లకు అమ్ముడయ్యాయి.

'పఠాన్' వంటి బ్లాక్‌బస్టర్ తర్వాత షారుఖ్-సిద్ధార్థ్ ఆనంద్ కాంబినేషన్‌లో వస్తున్న సినిమా కావడంతో 'కింగ్'పై భారీ అంచనాలున్నాయి. దీనికి తోడు షారుఖ్ తన కూతురు సుహానా ఖాన్‌తో కలిసి తొలిసారి స్క్రీన్ పంచుకుంటుండటం సినిమాపై మరింత ఆసక్తిని పెంచింది. తన పుట్టినరోజు సందర్భంగా నవంబర్ 2న సినిమాలోని తొలి పాటను విడుదల చేసి ప్రచార కార్యక్రమాలను షారుఖ్ ఇప్పటికే ప్రారంభించారు.

ఈ భారీ రాబడి వెనుక అంతే భారీ బడ్జెట్ కూడా ఉంది. మొదట రూ. 200 కోట్ల బడ్జెట్‌తో ప్లాన్ చేసిన ఈ సినిమా నిర్మాణ వ్యయం, ఇప్పుడు దాదాపు రూ. 400 కోట్లకు చేరినట్లు తెలుస్తోంది. ఇందులో షారుఖ్ రెమ్యునరేషన్ కలపలేదు. పబ్లిసిటీ, ఇతర ఖర్చులతో కలిపి మొత్తం బడ్జెట్ రూ. 500 కోట్లు దాటే అవకాశం ఉంది. దీపికా పదుకొణె, రాణి ముఖర్జీ, అభిషేక్ బచ్చన్ వంటి తారలు కూడా కీలక పాత్రల్లో కనిపించనున్న ఈ చిత్రం, క్రిస్మస్ కానుకగా డిసెంబర్ 24న ప్రపంచవ్యాప్తంగా విడుదల కానుంది.