బాలీవుడ్ నటుడు తుషార్ కపూర్‌కు రూ.5 కోట్ల కోసం బెదిరింపు కాల్ రావడం కలకలం రేపింది. తాను లారెన్స్ బిష్ణోయ్ గ్యాంగ్ సభ్యుడినంటూ ఓ ఆగంతుకుడు ఈ బెదిరింపులకు పాల్పడ్డాడు. అయితే, ఈ ఘటనపై దర్యాప్తు చేపట్టిన ముంబై క్రైమ్ బ్రాంచ్, ఇది ఫేక్ కాల్ అయి ఉండవచ్చని అనుమానిస్తోంది. కాలర్ వాయిస్ శాంపిల్స్ మ్యాచ్ కాకపోవడమే ఈ అనుమానాలకు ప్రధాన కారణంగా తెలుస్తోంది.

పోలీసు వర్గాల కథనం ప్రకారం.. తుషార్ కపూర్‌కు ఒక ఫోన్ కాల్ వచ్చింది. తాను లారెన్స్ బిష్ణోయ్ గ్యాంగ్ సభ్యుడైన 'హ్యారీ బాక్సర్' అని పరిచయం చేసుకున్న కాలర్, రూ.5 కోట్లు ఇవ్వాలని డిమాండ్ చేశాడు. దీంతో అప్రమత్తమైన తుషార్ కపూర్ వెంటనే ముంబై పోలీసులకు ఫిర్యాదు చేశారు. కేసును సీరియస్‌గా తీసుకున్న పోలీసులు, తక్షణమే విచారణను యాంటీ ఎక్స్టార్షన్ సెల్, క్రైమ్ బ్రాంచ్‌కు అప్పగించారు.

విచారణలో భాగంగా క్రైమ్ బ్రాంచ్ టెక్నికల్ టీమ్, బెదిరింపు కాల్ ఆడియో రికార్డింగ్‌ను క్షుణ్ణంగా పరిశీలించింది. తమ వద్ద ఉన్న హ్యారీ బాక్సర్ అసలు వాయిస్ శాంపిల్స్‌తో దానిని పోల్చి చూసింది. అయితే, రెండు వాయిస్ శాంపిల్స్ మధ్య ఎలాంటి పోలిక లేదని సీనియర్ పోలీస్ వర్గాలు వెల్లడించాయి. ఇతర ఆడియో శాంపిల్స్‌తో పోల్చినా ఫలితం మారకపోవడంతో బిష్ణోయ్ గ్యాంగ్ పేరు చెప్పి నటుడిని భయపెట్టి డబ్బు గుంజడానికి ఎవరో ప్రయత్నించి ఉండవచ్చని పోలీసులు ఒక నిర్ధారణకు వస్తున్నారు.

ఇటీవల నటుడు టైగర్ ష్రాఫ్‌ను లక్ష్యంగా చేసుకుని ముంబైలో జరిగిన కాల్పుల ఘటన తర్వాత ఈ బెదిరింపు కాల్ రావడం గమనార్హం. ఆ కాల్పులకు కూడా లారెన్స్ బిష్ణోయ్ గ్యాంగ్‌తో సంబంధం ఉన్నట్లు ఆరోపణలు వచ్చాయి. ఈ నేపథ్యంలోనే బాలీవుడ్‌లో భయాందోళనలు సృష్టించి, సులభంగా డబ్బు సంపాదించేందుకు కొందరు ఈ గ్యాంగ్ పేరును వాడుకుంటున్నారని పోలీసులు భావిస్తున్నారు. ప్రస్తుతానికి ఈ కేసులో పోలీసులు ఇంకా ఎఫ్ఐఆర్ నమోదు చేయలేదు. ఫోన్ కాల్ చేసిన ఆగంతుకుడు ఎవరనేది గుర్తించేందుకు, కాల్ ఎక్కడి నుంచి వచ్చిందో ట్రేస్ చేసేందుకు ముంబై క్రైమ్ బ్రాంచ్ దర్యాప్తును ముమ్మరం చేసింది.