Balakrishna: అనిల్ రావిపూడి సినిమాపై క్లారిటీ ఇచ్చేసిన బాలయ్య!

బోయపాటి దర్శకత్వంలో బాలకృష్ణ 'అఖండ' సినిమా చేస్తున్నారు. చిత్రీకరణ పరంగా ముగింపు దశకి చేరుకున్న ఈ సినిమా, దసరాకి విడుదలయ్యే అవకాశాలు ఉన్నాయనే టాక్ వినిపిస్తోంది. ఈ సినిమా తరువాత గోపీచంద్ మలినేని దర్శకత్వంలో బాలకృష్ణ ఒక సినిమా చేయనున్నాడు. కథానాయికగా శ్రుతి హాసన్ .. కీలకపాత్రకిగాను వరలక్ష్మి శరత్ కుమార్ పేర్లు వినిపిస్తున్నాయి. ఈ సినిమా తరువాత అనిల్ రావిపూడితో బాలకృష్ణ సినిమా ఉండనుందనే ప్రచారం జోరుగా సాగింది. కానీ తన పుట్టినరోజు సందర్భంగా బాలకృష్ణ ఈ సినిమాను గురించి ప్రస్తావించలేదు.

దాంతో ఈ కాంబినేషన్లో సినిమా ఉండకపోవచ్చని అంతా అనుకున్నారు. అభిమానులు కాస్త నిరాశకి లోనయ్యారు. అది గ్రహించిన బాలకృష్ణ ఈ విషయంలో వాళ్లకి క్లారిటీ ఇచ్చారు. అభిమానులతో జూమ్ మీట్ నిర్వహించిన బాలకృష్ణ, త్వరలో అనిల్ రావిపూడితో తన సినిమా ఉండనుందనే విషయాన్ని స్పష్టం చేశారు. ఈ ప్రాజెక్టు లైన్లోనే ఉందనే విషయాన్ని గట్టిగానే చెప్పారు. వరుస హిట్లతో దూసుకుపోతున్న అనిల్ రావిపూడి, బాలకృష్ణతో సినిమా చేయనున్నందుకు అభిమానులు ఫుల్ ఖుషీ అవుతున్నారు. మరి బాలకృష్ణ కోసం అనిల్ రావిపూడి ఎలాంటి కథను రెడీ చేశాడో చూడాలి.