Warina Hussain: ఎన్టీఆర్ సినిమాలో బాలీవుడ్ భామ!

మన తెలుగు సినిమాలలో ఇతర భాషల నుంచి వచ్చిన కథానాయికలు ఎక్కువగా రాజ్యమేలుతుంటారు. ముఖ్యంగా బాలీవుడ్ నుంచి వచ్చిన అమ్మాయిలే ఇక్కడ బాగా సక్సెస్ అవుతున్నారు. మన సినిమాలు ప్రధానంగా కమర్షియల్ సినిమాలు కావడంతో, ఎటువంటి సంకోచాలు లేకుండా గ్లామర్ ను ప్రదర్శించగల కథానాయికలు ముంబై భామలే కావడంతో, వారే ఇక్కడ ఎక్కువగా రాణిస్తున్నారు.

అదే కోవలో త్వరలో మరో బాలీవుడ్ భామ వరీన హుస్సేన్ కూడా టాలీవుడ్ ప్రవేశం చేయనున్నట్టు తెలుస్తోంది. పైగా, ప్రముఖ కథానాయకుడు ఎన్టీఆర్ నటించే సినిమా ద్వారా ఆమె పరిచయం కానుండడం విశేషం. త్రివిక్రమ్ శ్రీనివాస్ దర్శకత్వంలో ఎన్టీఆర్ హీరోగా ఓ భారీ చిత్రాన్ని నిర్మించడానికి సన్నాహాలు జరుగుతున్న విషయం విదితమే. ఈ చిత్రానికి సంబంధించిన ప్రీ ప్రొడక్షన్ పనులు దాదాపు పూర్తయ్యాయి. 'ఆర్ఆర్ఆర్' సినిమా పూర్తికాగానే ఎన్టీఆర్ ఈ చిత్రం షూటింగులో పాల్గొంటాడు.

ఇక ఇందులో ఇద్దరు కథానాయికలు నటిస్తారని, వీరిలో రెండో కథానాయిక పాత్రకు ఇప్పుడు వరీన హుస్సేన్ ను ఎంపిక చేశారనీ తెలుస్తోంది. దీనికి సంబంధించి ఇటీవల హైదరాబాదులో ఆమెకు టెస్ట్ షూట్ కూడా చేసి దర్శకుడు త్రివిక్రమ్ సంతృప్తిని వ్యక్తం చేశాడట. దాంతో ఆమెను ఫైనల్ చేసినట్టు సమాచారం. సల్మాన్ ఖాన్ నిర్మించిన 'లవ్ యాత్రి' సినిమా ద్వారా వరీన బాలీవుడ్ కి పరిచయమైంది. ఇదిలావుంచితే, ఈ సినిమాలో నటించే ప్రధాన నాయిక ఎవరన్నది ఇంకా ఫైనల్ కాలేదని అంటున్నారు.