వచ్చే ఏడాదిలోనే సెట్స్ పైకి 'ఎఫ్ 3'

దర్శకుడు అనిల్ రావిపూడి నుంచి గతంలో వచ్చిన 'ఎఫ్ 2' చిత్రం భారీ విజయాన్ని సాధించింది. వెంకటేశ్ - వరుణ్ తేజ్ కథానాయకులుగా నటించిన ఈ సినిమా, ఆ ఇద్దరి కెరియర్లోనే చెప్పుకోదగిన చిత్రంగా నిలిచింది. పూర్తి వినోదభరితంగా ప్రేక్షకులను అలరించిన ఈ సినిమాకి సీక్వెల్ చేయడానికి అనిల్ రావిపూడి రంగంలోకి దిగాడు.

ప్రస్తుతం సీక్వెల్ కి సంబంధించిన కథపై కసరత్తు జరుగుతోంది. ఈ ఏడాది ద్వితీయార్థంలో ఈ సినిమాను సెట్స్ పైకి తీసుకెళ్లాలని అనిల్ రావిపూడి భావించాడట. అయితే లాక్ డౌన్ కారణంగా .. వెంకటేశ్ కథానాయకుడిగా చేస్తున్న 'నారప్ప' .. బాక్సింగ్ నేపథ్యంలో వరుణ్ తేజ్ చేస్తున్న సినిమాలు వాయిదా పడ్డాయి.

లాక్ డౌన్ తరువాత ఈ సినిమాల షూటింగులు తిరిగి మొదలుకానున్నాయి. అందువలన 'ఎఫ్ 3' సినిమాను వచ్చే ఏడాదిలో సెట్స్ పైకి తీసుకెళ్లాలనే నిర్ణయానికి అనిల్ రావిపూడి వచ్చాడనేది తాజా సమాచారం. 'ఎఫ్ 2'లో వున్న ఆర్టిస్టులంతా దాదాపుగా ఉంటారని తెలుస్తోంది.