ప్రకటనల్లో కనిపించాలని ప్రధాని మోదీకి కాంక్ష: ఖుష్బూ విమర్శలు

ప్రధాని నరేంద్ర మోదీపై తమిళనాడు కాంగ్రెస్ అధికార ప్రతినిధి, నటి ఖుష్బూ విమర్శలు సంధించారు. ప్రకటనలపై ప్రధాని మోదీ సర్కారు చేసిన భారీ వ్యయాలు ఆమె విమర్శలకు కేంద్రబిందువు. ప్రధాని మోదీ 2014 మే నుంచి ఈ నాలుగేళ్ల కాలంలో రూ.4343 కోట్లను ప్రకటనలపై ఖర్చు చేసినట్టు ఇటీవలే వెల్లడైన సంగతి గుర్తుండే ఉంటుంది. సమాచార హక్కు చట్టం కింద వచ్చిన ఓ దరఖాస్తుకు కేంద్రమే ఈ వివరాలు తెలిపింది.

దీనిపై ఖష్బూ స్పందించారు. దివంగత కామరాజర్ ప్రజల నుంచి పన్నుల రూపంలో వచ్చిన ప్రతి రూపాయిని విద్య కోసం ఖర్చు చేసిన విషయాన్ని ఆమె ఈ సందర్భంగా గుర్తు చేశారు. కానీ ప్రధాని మోదీ మాత్రం ప్రకటనల కోసం భారీగా ఖర్చు చేసి ప్రజలపై భారం మోపారని పేర్కొన్నారు. ఆయనకు టీవీలు, పత్రికల్లో కనిపించాలన్న మోజు ఉందని తెలుస్తోందన్నారు.