అండర్-19 ఆసియా కప్ ఫైనల్లో పాకిస్థాన్‌పై భారత జట్టు ఒక వికెట్ తేడాతో చిరస్మరణీయ విజయం సాధించి ట్రోఫీని కైవసం చేసుకుంది. అయితే మ్యాచ్ ముగిసిన తర్వాత భారత యువ ఆటగాళ్లు మైదానంలో చేసుకున్న సంబరాల తీరు ప్రస్తుతం తీవ్ర చర్చనీయాంశంగా మారింది. భారత ఆటగాళ్ల దూకుడు ప్రవర్తనపై పాకిస్థాన్ మాజీ కెప్టెన్ మహ్మద్ యూసుఫ్ తీవ్ర అసంతృప్తి వ్యక్తం చేశాడు. క్రీడల్లో రాణించడంతో పాటు నడవడిక, సంస్కారం కూడా ఎంతో ముఖ్యమని వ్యాఖ్యానించాడు.

మ్యాచ్ ముగిసిన అనంతరం భారత ఆటగాళ్లు సంబరాలు చేసుకుంటున్న దృశ్యాలు సోషల్ మీడియాలో వైరల్‌గా మారాయి. భారత ఆటగాళ్లు మనాల్ చౌహాన్, మోహిత్ ఉల్వా, చిగురుపాటి వెంకట తదితరులు పాకిస్థాన్ ఆటగాళ్లను ఉద్దేశించి దూకుడుగా సైగలు చేస్తూ కనిపించారు. పరిస్థితి చేయిదాటిపోకుండా భారత సహాయక సిబ్బంది (సపోర్ట్ స్టాఫ్) వెంటనే జోక్యం చేసుకుని, యువ ఆటగాళ్లను పక్కకు లాగి శాంతింపజేశారు.

ఈ ఘటనపై మహ్మద్ యూసుఫ్ సోషల్ మీడియా వేదికగా స్పందించారు. తీవ్రమైన ఒత్తిడిలో భారత జట్టు విజయం సాధించడాన్ని ప్రశంసించిన అతడు, ఈ టోర్నీ భవిష్యత్ స్టార్లకు మంచి వేదిక అని పేర్కొన్నాడు. అయితే యువ ఆటగాళ్ల ప్రవర్తనను ప్రస్తావిస్తూ కీలక వ్యాఖ్యలు చేశాడు. 

"మీరు ఏ స్థాయిలో క్రీడల్లో ఆడినా లేదా పోటీ పడినా, కేవలం మీ దేశానికి మాత్రమే ప్రాతినిధ్యం వహించడం లేదు. నిజానికి మీ పెంపకం, విలువలు, మీ తల్లిదండ్రులు చిన్నతనంలో నేర్పిన నైతికతకు కూడా మీరు ప్రతినిధులుగా ఉంటారు. అందుకే గెలిచినా, ఓడినా ఎల్లప్పుడూ గౌరవంగా, హుందాగా ఉండాలి. ఫలితంతో సంబంధం లేకుండా మీరు ప్రవర్తించే తీరులోనే అసలైన క్రీడాస్ఫూర్తి కనిపిస్తుంది” అని యూసుఫ్ పేర్కొన్నారు. ఈ సందర్భంగా దిగ్గజ క్రికెటర్లు సచిన్ టెండూల్కర్, సయీద్ అన్వర్‌లను రోల్ మోడల్స్‌గా గుర్తుచేశాడు.

ఈ మ్యాచ్ విషయానికి వస్తే.. తొలుత బ్యాటింగ్ చేసిన పాకిస్థాన్ నిర్ణీత 50 ఓవర్లలో 9 వికెట్ల నష్టానికి 337 పరుగులు చేసింది. ఉస్మాన్ ఖాన్ 107 పరుగులతో సెంచరీ సాధించగా, అబ్దుల్ ఖాదిర్ 80, ఫర్హాన్ యూసఫ్ 60 పరుగులు చేశారు. భారత బౌలర్లలో కవ్య పటేల్ 4 వికెట్లు తీశారు.

అనంతరం 338 పరుగుల భారీ లక్ష్యంతో బరిలోకి దిగిన భారత్ ఒకానొక దశలో 42 ఓవర్లలో 252 పరుగులకే 8 వికెట్లు కోల్పోయి పీకల్లోతు కష్టాల్లో పడింది. ఈ దశలో మనాల్ చౌహాన్ (32 బంతుల్లో 47), మోహిత్ ఉల్వా (26 బంతుల్లో 49 నాటౌట్) 9వ వికెట్‌కు 57 పరుగులు జోడించి మ్యాచ్‌ను మలుపు తిప్పారు. మనాల్ ఔటైన తర్వాత 11వ నంబర్ బ్యాటర్ సి. వెంకట (11 నాటౌట్) మోహిత్‌కు చక్కటి సహకారం అందించారు. చివరి ఓవర్లో విజయానికి 8 పరుగులు అవసరం కాగా, మోహిత్ ఉల్వా ఆఖరి బంతిని బౌండరీకి తరలించి భారత్‌ను 339/9తో గెలిపించారు. ఉత్కంఠ పోరులో గెలిచి ట్రోఫీని కైవసం చేసుకున్నప్పటికీ, ఆ తర్వాత మైదానంలో చోటుచేసుకున్న పరిణామాలు క్రికెట్ వర్గాల్లో భిన్న వాదనలకు దారితీశాయి.