గర్భంలోని శిశువుకు వెన్నెముక ఆపరేషన్.. వైద్య రంగంలో భారత్ సరికొత్త చరిత్ర

భారత వైద్య రంగంలో ఓ అద్భుతం ఆవిష్కృతమైంది. ఢిల్లీలోని అఖిల భారత వైద్య విజ్ఞాన సంస్థ (ఎయిమ్స్) వైద్యులు దేశంలోనే తొలిసారిగా తల్లి గర్భంలోని శిశువుకు వెన్నెముక శస్త్రచికిత్స చేసి సరికొత్త చరిత్ర సృష్టించారు. 25 వారాల గర్భస్థ శిశువు వెన్నెముకలో ఉన్న తీవ్రమైన లోపాన్ని 'ఓపెన్ ఫీటల్ సర్జరీ' ద్వారా విజయవంతంగా సరిచేశారు.

గురువారం ఎయిమ్స్ న్యూరోసైన్సెస్ సెంటర్‌లో ఈ క్లిష్టమైన శస్త్రచికిత్స జరిగింది. న్యూరోసర్జరీ విభాగానికి చెందిన డాక్టర్ దీపక్ గుప్తా నేతృత్వంలో దాదాపు 30 మందికి పైగా నిపుణులు ఈ ఆపరేషన్‌లో పాల్గొన్నారు. గైనకాలజీ, న్యూరో సర్జరీ, అనస్థీషియా, ప్లాస్టిక్ సర్జరీ సహా పలు విభాగాల వైద్యులు, నర్సులు సుమారు 6 గంటల పాటు శ్రమించి దీనిని విజయవంతం చేశారు.

గర్భస్థ శిశువు 'లంబోసాక్రల్ మైలోమెనింగోసీల్‌' అనే అరుదైన జన్యుపరమైన నాడీ సమస్యతో బాధపడుతున్నట్లు వైద్యులు గుర్తించారు. ఈ సమస్య వల్ల పుట్టిన తర్వాత పిల్లలకు పక్షవాతం, మెదడులో నీరు చేరడం వంటి తీవ్ర వైకల్యాలు సంభవిస్తాయి. గర్భంలో ఉండగానే ఈ లోపాన్ని సరిచేయడం ద్వారా భవిష్యత్తులో వచ్చే ప్రమాదాలను నివారించవచ్చని డాక్టర్ దీపక్ గుప్తా తెలిపారు.

ఈ అరుదైన ఆపరేషన్ కోసం ఎయిమ్స్ వైద్య బృందం ఐదు వారాలకు పైగా సన్నాహాలు చేసింది. ఆధునిక ఇమేజింగ్ పరీక్షలతో పాటు, శస్త్రచికిత్సకు ముందు మాక్ డ్రిల్స్ కూడా నిర్వహించారు. కేంద్ర ప్రభుత్వ జననీ శిశు సురక్ష కార్యక్రమం కింద ఈ సర్జరీని పూర్తిగా ఉచితంగా నిర్వహించారు. ప్రస్తుతం తల్లి, గర్భంలోని శిశువు ఆరోగ్య పరిస్థితి స్థిరంగా ఉన్నట్లు వైద్యులు ప్రకటించారు. ఈ ఘనత వెనుక 14 ఏళ్ల కృషి ఉందని ఎయిమ్స్ యాజమాన్యం వెల్లడించింది.