కాన్పూర్ సమీపంలో పట్టాలు తప్పిన గోరఖ్‌పూర్ రైలు.. 300 మంది ప్రయాణికులు సురక్షితం

ఉత్తరప్రదేశ్‌లోని కాన్పూర్ సెంట్రల్ రైల్వే స్టేషన్‌లో నిన్న‌ సాయంత్రం ఓ రైలు ప్రమాదం జరిగింది. గోరఖ్‌పూర్ వెళుతున్న చౌరీ చౌరా ఎక్స్‌ప్రెస్‌కు చెందిన నాలుగు ఏసీ కోచ్‌లు పట్టాలు తప్పాయి. అయితే, ఈ ఘటనలో ఎవరికీ ఎలాంటి గాయాలు కాకపోవడంతో అధికారులు, ప్రయాణికులు ఊపిరి పీల్చుకున్నారు.

వివరాల్లోకి వెళితే.. కాన్పూర్ అన్వర్‌గంజ్ నుంచి గోరఖ్‌పూర్‌కు బయలుదేరిన చౌరీ చౌరా ఎక్స్‌ప్రెస్ (ట్రైన్ నంబర్ 15003), సాయంత్రం 5:03 గంటలకు కాన్పూర్ సెంట్రల్ స్టేషన్‌లోని ప్లాట్‌ఫామ్ 7 నుంచి కదిలింది. స్టేషన్ దాటిన కొన్ని నిమిషాలకే బీ-4, బీ-5, బీ-6, బీ-7 ఏసీ కోచ్‌లు ఒక్కసారిగా పట్టాల నుంచి పక్కకు జరిగాయి. ఒక్కో కోచ్‌కు చెందిన ఒక ట్రాలీ పట్టాలు తప్పడంతో ప్రయాణికులు తీవ్ర ఆందోళనకు గురయ్యారు.

ప్రమాదం జరిగిన సమయంలో ఈ నాలుగు బోగీల్లో సుమారు 300 మంది ప్రయాణికులు ఉన్నట్లు అధికారులు తెలిపారు. వారందరినీ సురక్షితంగా కిందకు దించి, ప్లాట్‌ఫామ్ 1కి తరలించారు. అక్కడ వారికి అల్పాహారం, ఇతర సౌకర్యాలు కల్పించారు. వారి గమ్యస్థానాలకు చేర్చేందుకు 4 నుంచి 5 గంటల్లో ప్రత్యేక రైలును ఏర్పాటు చేస్తున్నట్లు రైల్వే అధికారులు ప్రకటించారు. ప్రయాణాన్ని రద్దు చేసుకునే వారికి పూర్తి రీఫండ్ ఇస్తామని తెలిపారు.

సమాచారం అందిన వెంటనే రైల్వే అధికారులు, ఇంజినీరింగ్ సిబ్బంది, ప్రయాగ్‌రాజ్ నుంచి సీనియర్ అధికారులు ఘటనా స్థలానికి చేరుకుని సహాయక చర్యలు చేపట్టారు. ఎలాంటి గాయాలు కాలేదని పోలీసు కమిషనర్ రఘుబీర్ లాల్ ధ్రువీకరించారు. రైల్వే సేఫ్టీ బృందం ఈ ప్రమాదానికి గల కారణాలపై విచారణ జరుపుతుందని అధికారులు తెలిపారు. కాగా, నిన్న‌ దేశంలో ఇది రెండో రైలు ప్రమాదం. ఉదయం అస్సాంలో కోల్‌కతా-సైరంగ్ ఎక్స్‌ప్రెస్ పట్టాలు తప్పిన ఘటనలో నలుగురు గాయపడ్డారు.